13 მაისს, ევროპის რეკონსტრუქციისა და განვითარების ბანკის (EBRD) ყოველწლიური კონფერენციის ფარგლებში, ფრანგული ორგანიზაციის MEDEF International-ის წარმომადგენელი, ბოგდან გადენ-ფიირჩაკი საქართველოში ვიზიტით იმყოფება. აღნიშნულთან დაკავშირებით, დღეს, 12:00 საათზე, საქართველოს ეკონომიკისა და მდგარდი განვითარების სამინისტროში, ბოგდანთან და ასევე, სხვა ფრანგული კომპანიის წარმომადგენლებთან: ტასისიდით ჰანზაისთან, ბაუდოინ ვან რობაისთან, სამუელ ფორნეაქსთან, იბრაგიმ ულბაშევთან, მანონ რუხაძესა და ია გაბუნიასთან მინისტრის მოადგილის, ქეთევან ბოჭორიშვილის და მეწარმეობის განვითარების სააგენტოს დირექტორის, გიორგი ციკოლიას შეხვედრა გაიმართება.
ფრანგული ორგანიზაცია MEDEF International საქართველოს მეწარმეობის განვითარების სააგენტოს მომიჯნავე პროფილის არაკომერციული ორგანიზაციაა, რომელიც კონცენტრირებულია ნოუ-ჰაუს დანერგვასა და ხელს უწყობს საერთაშორისო ვაჭრობისა და საინვესტიციო გარემოს განვითარებას მსოფლიო მასშტაბით. MEDEF International საკმაოდ წარმომადგენლობითი ხასიათის მატარებელი დაწესებულებაა და ორიენტირებულია ფრანგული კერძო კომპანიებსა და დანარჩენ მსოფლიოს შორის კავშირების დამყარებაზე, გრძელვადიანი და მდგრადი პარტნიორობის ჩამოყალიბების მიზნით. ამავდროულად, ხაზგასასმელია, რომ MEDEF International წარმოადგენს მსოფლიო ბანკისა და EBRD-ის სამეკავშირეო ოფისს კერძო სექტორის სფეროში და მოწოდებულია მმართველი ორგანოებისა და ბიზნეს კლიმატის გაუმჯობესებისკენ.
ხსენებული ორგანიზაციისა და საქართველოს მხარის საქმიანი შეხვედრა მიზნად ისახავს პარიზში ფრანგულ კომპანიებთან ქართული შესაბამისი უწყებების წარმომადგენლების შეხვედრებისთვის საჭირო საორგანიზაციო საკითხების შეთანხმებას. ამასთანავე, მხარეები იმსჯელებენ სამომავლო თანამშრომლობის პერსპექტივებისა და მოცემული კუთხით ურთიერთობის გაღრმავების მექანიზმების შესახებ. გარდა ამისა, ვიზიტის ფარგლებში ყურადღება გამახვილდება შემდგომში ნაყოფიერი და მტკიცე პარტნიორობის ჩამოყალიბების კუთხით გადასადგმელ ნაბიჯებსა და აქტივობებზე.
