ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ ეკა ბესელიამ საქართველოს და კერძოდ სამეგრელოს განვითარებაზე ისაუბრა გადაცემა «არჩევანის» პირდაპირ ეთერში. მან აღნიშნა, რომ საქართველო ამჟამინდელ ხელისუფლების ხელში არ გაჩერებულა და პირიქით აყვავების გზაზე დგას.
«საქართველო გაჩერებული იყო, მაშინ როდესაც ემსახურებოდა, მართლაც, ამ ჯიბის პოლიტიკოსებს... ის საქართველო დღეს შოკიდან გამოდის», – განაცხადა ბესელიამ.
«სამეგრელო, რომელსაც ცხრა წლის განმავლობაში აკადრებდნენ იმას, რასაც არ აკადრებენ არავის, მტერი რომ მტერია - ისიც არ იზამდა ამას, რაც ამ მაოხრებლებმა ჩაიდინეს... ყოველი მესამე ადამიანი სამეგრელოში გასამართლებულია, ყოველი მეორე ოჯახი დაზარალებულია, საშინელი რეპრესიები გაიარა ამ კუთხემ. დასახიჩრებული გვამები, ზოგი გაუჩინარებული, ზოგი დღეს ნაპოვნი. და აი ამ რეგიონზე ამბობენ, ჩვენი ოპონენტები [ნაციონალური მოძრაობა], რომ, თურმე, ნაციონალური მოძრაობას ხვდებიან სიამტკბილობით. ეს არის ტყუილი». - აღნიშნა საპარლამენტო უმრავლესობის წევრმა.
ბესელიას განცხადებით, დღეს ის ფოთში იმყოფებოდა, სადაც ქალაქის ინფრასტრუქტურა დაათვალიერა.
«რაც შეეხება პროექტებს. 946–ზე მეტი პროექტი განხორციელდა მარტო სამეგრელოს რეგიონში.ფოთში იუსტიციის სახლის მშენებლობა სრულდება, თეატრის მშენებლობა, რომელიც გაჩერებული იყო მათ პერიოდში, ჩვენ დავასრულეთ. რაგბის სტადიონზე ვიყავი, რომელიც ბიძინა ივანიშვილმა პირადად თავისი რესურსით ააშენა - მან 6 მილიონზე მეტი გაიღო. ქვაფენილები იგება, წყლის გაყვანილობები იცვლება. მიწისქვეშა კომუნიკაციის არხები იცვლება. რამდენიმე ახალი საწარმოს შენება იწყება. ეს არის ის პროექტები, რომლებიც რეგიონის და ქვეყნის ფეხზე დაყენებას ემსახურება და ასევე მოსახლეობის დასაქმებას», - დასძინა ბესელიამ.
შეგახსენებთ, რომ დღეს გადაცემა „არჩევანში“ განიხილებოდა NDI-ის კვლევა, რომლის თანახმადაც რესპონდენტების უმრავლესობამ პირველ პლანზე ცუდი ეკენომიკური მდგომარეობა წამოსწია.
