საქართველოს პრემიერ-მინისტრმა ირაკლი ღარიბაშვილმა ე.წ. კაბელების საქმეზე ვრცელი განმარტება გააკეთა და აღნიშნა, რომ ეს საქმე ირაკლი ალასანიას და მისი გუნდის წინააღმდეგ არ ყოფილა მიმართული.
ფრაქცია „თავისუფალი დემოკრატების“ წევრებთან შეხვედრაზე პრემიერმა დაადასტურა, რომ ალასანია მასთან მივიდა და პროკურატურის წარმომადგენლებთან შეხვედრის ორგანიზება სთხოვა, თუმცა მიიჩნია, რომ მისი მხრიდან რაიმე ფორმით ჩარევა სწორი არ იქნებოდა.
,,მინდა გითხრათ ის, რაც არასდროს მითქვამს საჯაროდ და ქრონოლოგიურად მოგიყვეთ რაც მოხდა, რათა თავისუფალი დემოკრატების წინააღმდეგ შერჩევით სამართალზე ეჭვები გამოირიცხოს. ამ საქმესთან დაკავშირებით გამოძიება დაიწყო ივნისის თვეში, ამის შესახებ ალასანიასთვის კი ცოტა მოგვიანებით გახდა ცნობილი. გიდასტურებთ, რომ ალასანია მოვიდა ჩემთან და მთხოვა პროკურატურის წარმომადგენლებთან მომხდარიყო შეხვედრის ორგანიზება, რაზეც მე ვუთხარი, რომ არ იქნებოდა სწორი რაიმე ფორმით ჩავრეულიყავი ამ საქმეში. ვუთხარი ისიც, რომ სანერვიულო არაფერი იყო და თუ პროკურატურა ნახავდა, რომ არავითარი დანაშაული არ მომხდარა, არაფერი მოხდებდა - გამოძიების პროცესში ჩარევას არასდროს ვიკადრებ და ეს მას ნათლად განვუმარტე. შემდეგ ხდება ის, რომ სექტემბერში ისევ მოდის ალასანია და მეუბნება, რომ გადაწყვეტილი აქვს პარტიის თავმჯდომარედ დაბრუნება. აქედან გამომდინარე, სპეკულაცია იმის თაობაზე, რომ სწორედ მისი პოლიტიკური მიზნების წინააღმდეგ მოხდა აღნიშნულ საქმეზე გამოძიების დაწყება, არის სრული სიცრუე. თქვენ შესაძლოა არ გაქვთ სრული ინფორმაცია ამ საკითხთან დაკავშირებით, მაგრამ დროში, როგორც მინიმუმ 3-4 თვით არის აცდენილი,” - განმარტა პრემიერმა.
„თავისუფალი დემოკრატებიდან“ მას ნინო გოგუაძემ უპასუხა და აღნიშნა, რომ ისინი ე.წ. კაბელების საქმეზე სპეციალურად არ საუბრობდნენ.
„არ მოგვითხოვია ამ ქრონოლოგიის მოყოლა. უმრავლესობას მოუყევით ამ საქმის შესახებ. მილიონჯერ მოვისმინეთ უკვე ამის შესახებ. თქვენ გვიყვებით ამბებს. ჩვენ არ გვიკითხავს ეს. ძალიან დიდ პატივს ვცემთ ინსტიტუციებს. სპეციალურად არც ერთი კითხვა არ დავსვით „კაბელების“ საქმეზე, იმიტომ, რომ საქმე სასამართლოშია. ჩვენ ამ საქმეზე არაფერი გვიკითხავს“, - მიმართა გოგუაძემ პრემიერს.
თავის მხრივ, ღარიბაშვილმა აღნიშნულ რეპლიკას უპასუხა და განაცხადა, რომ ე.წ. კაბელების საქმეს პოლიტიკური ელფერი მიეცა, რაც დასანანია. პრემიერის თქმით, ვინ არის დამნაშავე ე.წ. კაბელების საქმეში, ეს ობიექტურმა სასამართლომ უნდა გადაწყვიტოს.
