,,ნაციონალურ მოძრაობაში” საქართველოს პრეზიდენტის გიორგი მარგველაშვილის გადაწყვეტილებას იწონებენ და აცხადებენ, რომ დაუშვებელია ფორსმაჟორულ ვითარებაში მთავრობის ფორმირება. როგორც საპრლამენტო უმცირესობის ლიდერმა დავით ბაქრაძემ საგანგებო ბრიფინგზე განმარტა, პარლამენტში წარმოსადგენი მთვრობის კაბინეტი საკუთარი შემადგენლობით, პროგრამით, ედვით იმეორებს ყველაფერს იმას, რაც გრძელდებოდა ბოლო თვეების განმავლობაში.
"სრულიად ნათელია, რომ ჩვენს საზოგადოებაში არსებობს ძალიან სერიოზული მოთხოვნა და დაკვეთა, რომ ქვეყანაში რადიკალური ცვლილებები მოხდეს, ვინაიდან არსებულმა მართვის სტილმა, არაფორმალურმა ხელმძღვანელობამ, მთავრობის უნიათობამ, წარმოდგენილმა კაბინეტმა საქართველო და თითოეული ოჯახი შეიყვანა ძალიან ღრმა ფინანსურ, ეკონომიკურ და პოლიტიკური კრიზისში. სრულიად ნათელია ისიც, რომ მთავრობა ცდილობს თავი აარიდოს ამ ცვლილებებს და პარლამენტში წარმოსადგენი კაბინეტი საკუთარი შემადგენლობით, პროგრამითა და ხედვით იმეორებს ყველაფერს იმას, რაც გრძელდებოდა ამ თვეების განმავლობაში და რამაც საქართველოში ვითარების გაუარესება, ოჯახების გაღარიბება, ეკონომიკური კრიზისი და არასტაბილურობა მოგვიტანა. აქედან გამომდინარე, ჩვენ მივესალმებით და მხარს ვუჭერთ პრეზიდენტ მარგველაშვილის ინიციატივას, რომ არ მოხდეს მთავრობის წარმოდგენა ამ ფორმით, მითუმეტეს, ასეთი ნაჩქარევი, ქაოტური და გაუაზრებელი გზით და მოხდეს პრეზიდენტის მიერ კონსტიტუციური ვადის გამოყენება", - განაცხადა ბაქრაძემ.
დავით ბაქრაძე იმედს გამოთქვამს, რომ პრეზიდენტის მხრიდან ერთკვირიანი ვადის დასახელება მთავრობის ახლი გუნდის ჩამოყალიბების საკითხზე არ იქნება მხოლოდ დროის მექანიკური გაწელვა.
,,ჩვენ ველით პრეზიდენტ მარგველაშვილისგან, რომ ეს ერთი კვირა იქნება არა დროის მექანიკური გაწელვა, არამედ ის, როგორც ქვეყნის პრეზიდენტი და უმაღლესი თანამდებობის პირი, გადადგამს რეალურ ნაბიჯებს იმისთვის, რომ ამ ერთი კვირის განმავლობაში საზოგადოებამ და ქვეყანამ რეალური ცვლილებები მიიღოს. ეს მოლოდინი არსებობს საზოგადოებაში, პოლიტიკურ პარტიებში, ამიტომ ჩვენ მზად ვართ, ამ პროცესში მონაწილეობისთვის. ჩვენ ვითხოვთ პრეზიდენტთან შეხვედრას, რათა საზოგადოებამ და ქვეყანამ აღარ მიიღოს ხელისუფლება და მთავრობა, რომელმაც ის შეიყვანა კრიზისში და ამ ერთკვირიან ვადას რეალური ცვლილებები მოჰყვეს", - განაცხადა ბაქრაძემ.
