მიმდინარე კვირას რამდენიმე პარტნიორ სახელმწიფოსთან პოლიტიკური კონსულტაციები გაიმართებაა. როგორც ჟურნალისტებთან საგარეო უწყების პრესსპიკერმა დავით კერესელიძემ განაცხადა, კონსულტაციების ფარგლებში განხილული იქნება ორმხრივი და მრავალმხრივი თანამშრომლობის ფართო სპექტრი.
,,27 აპრილს, შვეიცარიაში გაიმართება ორმხრივი პოლიტიკური კონსულტაციები საქართველოსა და შვეიცარიის საგარეო საქმეთა სამინისტროებს შორის. საქართველოს დელეგაციას უხელმძღვანელებს საგარეო საქმეთა მინისტრის მოადგილე გიგი გიგიაძე. კონსულტაციების ფარგლებში განხილული იქნება ორმხრივ და მრავალმხრივ ფორმატში თანამშრომლობის საკითხების ფართო სპექტრი. 29 აპრილს, თბილისში, გაიმართება საქართველოსა და დიდი ბრიტანეთისა და ჩრდილოეთ ირლანდიის გაერთიანებულ სამეფოს შორის ყოველწლიური ორმხრივი პოლიტიკური დიალოგის - ,,უორდროპის დიალოგი“ შუალედური რაუნდი. მოლაპარაკებებში მონაწილეობას მიიღებენ საქართველოსა და გაერთიანებულ სამეფოს უწყებათაშორისი დელეგაციები. შუალედური მოლაპარაკებები გაიმართება პლენარული სხდომისა და სამუშაო ჯგუფების შეხვედრების ფორმატში, საგარეო საქმეთა სამინისტროში დეპარტამენტის დირექტორთა დონეზე. შეხვედრის ფარგლებში იმუშავებს სამი სამუშაო ჯგუფი: პირველი ჯგუფი საგარეო პოლიტიკისა და ორმხრივი პოლიტიკური საკითხები; მეორე ჯგუფი - თავდაცვისა და ეროვნული უსაფრთხოების საკითხები; მესამე ჯგუფი ეკონომიკური, კომერციული და ენერგეტიკული საკითხები.მოგეხსენებათ, რომ „უორდროპის დიალოგს“ გასულ წელს ჩაეყარა საფუძველი. ეს გახლავთ დიდ ბრიტანეთსა და საქართველოს შორის თანამშრმომლობის ახალი, სტრატეგიული ფორმატი. პირველი შეხვედრა აღნიშნული ფორმატის ფარგლებში გაიმართა დიდ ბრიტანეთში, საგარეო საქმეთა მინისტრების დონეზე”, _განაცხადა დავით კერესელიძემ.
მისივე განმარტებით, ასევე 30 აპრილს, საგარეო საქმეთა სამინისტროში, გაიმართება ორმხრივი პოლიტიკური კონსულტაციების მორიგი რაუნდი ესპანეთის სამეფოსა და საქართველოს საგარეო უწყებებს შორის. როგორც კერსელიძემ განაცხადა ქართული მხრიდან, პოლიტიკურ კონსულტაციებს უხელმძღვანელებს მინისტრის მოადგილე გიგი გიგიაძე, ხოლო ესპანეთის დელეგაციას უხელმძღვანელებს ესპანეთის საგარეო საქმეთა სამინისტროს საგარეო პოლიტიკისა და უსაფრთხოების დეპარტამენტის გენერალური დირექტორი ენრიკე მორა.
