2017 წლის ბოლომდე აჭარას კიდევ ერთი ტურისტული ობიექტი შეემატება. აჭარის მთავრობის თავმჯდომარემ არჩილ ხაბაძემ და აჭარის ფინანსთა და ეკონომიკის მინისტრმა დავით ბალაძემ სასტუმრო კომპლექს „მეტრო სითი“-ს მშენებლობის პროცესი მოინახულეს. მთავრობის წარმომადგენლებმა მშენებლობის მიმდინარეობის შესახებ ინფორმაცია კომპანიის მენეჯმენტისგან მიიღეს.
ამ ეტაპზე აპარტამენტების საძირკვლის ჩაყრისა და სასტუმროსა და კაზინოს მეორე სართულის მშენებლობის სამუშაოები მიმდინარეობს. მშენებლობის მეორე ეტაპი დაწყებულია და თვის ბოლოს დასრულდება. 12 სართულიანი სასტუმრო კომპლექსი „მეტრო სითი“ მინიმუმ 203 ნომრიანი იქნება. დაგეგმილია ასევე ორი 420 ბინიანი აპარტამენტის მშენებლობა. კომპანია აღნიშნული პროექტით რეგიონში 90 მლნ აშშ დოლარის ინვესტიციის განხორციელებას გეგმავს. სასტუმრო „მეტრო სითიში“ 1500 ადამიანზე გათვლილი საკონფერენციო დარბაზი, სავაჭრო ცენტრის,VIP რეზიდენცია, სამორინე და სხვა ობიექტები განთავსდება. აღნიშნული ინვესტიცია 600 დან 1500 მდე ადამიანის დასაქმებას ითვალისწინებს. სასტუმროს მშენებლობა, კომპანიის განცხადებით, ხელშეკრულებით გათვალისწინებულ ვადაზე 2 წლით ადრე - 2017 წლის ბოლოს დასრულდება.