ტურიზმის ეროვნულმა ადმინისტრაციამ აზერბაიჯანში, ბაქოს საერთაშოროსი გამოფენაში მიიღო მონაწილეობა. ,,AITF 2015“ 2-4 აპრილის ჩათვლით გაიმართა. ტურიზმის ეროვნულ ადმინისტრაციასთან ერთად საქართველოს სტენდზე წარმოდგენილნი იყვნენ: აჭარის ტურიზმისა და კურორტების დეპარტამენტი, ქუთაისის მერია, დაცული ტერიტორიების სააგენტო, კურორტი საირმე, სასტუმრო მგზავრები, Lopota Resort, Liberty Georgia და Capital Georgia. ბაქოს მე-14 საერთაშორისო გამოფენა-ბაზრობაზე 42 ქვეყნის 371 კომპანია იყო წარმოდგენილი.
გამოფენის ოფიციალურ გახსნას საქართველოს საგანგებო და სრულუფლებიანი ელჩი აზერბაიჯანის რესპუბლიკაში თეიმურაზ შარაშენიძე დაესწრო.
,,AITF 2015“ გამოფენაზე საერთაშორისო კომპანიების წარმომადგენლებსა და ტურისტებს შორის საქართველოს სტენდმა დიდი ინტერესი გამოიწვია. საქართველოში მოგზაურობის მსურველები დაინტერესდნენ როგორც ზაფხულის ასევე ზამთრის კურორტებით, ასევე გამაჯანსაღებელი და კულტურული ტურებით.
