Informationen zu Tastenkürzeln erfahren Sie über „?“

პრეზიდენტმა სპორტის საერთაშორისო დღესთან დაკავშირებით დაჭრილი სამხედრო მოსამსახურეები დააჯილდოვა.

აშშ-ში პენდლეტონის საზღვაო ქვეითთა ბაზაზე გამართულ საერთაშორისო შეჯიბრებებში „დაჭრილ მეომართა თამაშებში“ გამოვლენილი მებრძოლი სულისა და მიღწეული წარმატებებისთვის ღირსების მედლები უმაღლესმა მთავარსარდალმა 12 სამხედრო მოსამსახურეს გადასცა.
საქართველოს პრეზიდენტმა სიტყვით მიმართა შეკრებილ საზოგადოებას და სამხედრო მოსამსახურეებს წარმატებები უსურვა:
„გვინდა განსაკუთრებული სიყვარულით და მადლიერებით აღვნიშნოთ ჩვენი პარასპორტსმენების მიღწევები. ჩემთვის დიდი პატივია, რომ დღეს საქართველოს სახელმწიფოს სახელით, კიდევ ერთხელ შემიძლია გითხრათ მადლობა, კიდევ ერთხელ გავუსვა ხაზი თქვენს მიღწევებს და დაგაჯილდოვოთ სახელმწიფო ჯილდოებით. თქვენ ემსახურეთ სამშობლოს და ამ სამსახურში ყველაზე მნიშვნელოვანი გაიღეთ, თქვენი ჯანმრთელობა. მაგრამ ქვეყნისთვის თქვენი სამსახური ამით არ დამთვარდა. თქვენ შეძელით და გახდით გამოჩენილები თქვენს სპორტულ მიღწევებში, კიდევ ერთხელ ასახელეთ ჩვენი სამშობლო. ყველა იმ ადამიანს ვინც თქვენ გგულშემატკივრობთ მიეცით მაგალითი გამბედაობის, სიცოცხლის უნარიანობის და გამარჯვების. ბუნებრივია თქვენი ღვაწლისთვის, თქვენი წვლილისთვის, თქვენს მიერ ქვეყნის სამსახურისთვის, საქართველოს სახელმწიფოს სახელით მადლობას გიხდით. მინდა მოგილოცოთ თქვენ და სპორტსმენებს სპორტის საერთაშორისო დღე. განსაკუთრებით ბუნებრივია ვულოცავ ბატონ მინისტრს, ბატონ ლევან ყიფიანს და მადლობა მინდა ვუთხრა იმ ღვაწლისთვის, რაც ქართველ პარასპორტსმენთა საქმეში მან შეიტანა. ხაზგასმით მინდა აღვნიშნო თავდაცვის სამინისტროს როლი ამ მიმართულებით, იმიტომ რომ თავდაცვის სამინისტრო დღეს განსაკუთრებულ ყურადღებას აქცევს იმ ადამიანებს ვინც ემსახურება ჩვენს სამშობლოს და ეს ყურადღება გამოიხატება თქვენთან ერთად პრობლემების დაძლევაში. მინდა მადლობა ვუთხრა ბრიტანეთის და შეერთებული შტატების საელჩოებს იმ ღვაწლისათვის, რაც ამ ორი ქვეყნის დამსახურებით არის აი ამ პროცესში, დიდი მადლობა ბატონ და ქალბატონ ელჩს. კიდევ ერთხელ მადლობას გიხდით სამსახურისთვის და თქვენთან ერთად მზად ვართ მომავალი გამარჯვებებისათვის.“-განაცხადა საქართველოს პრეზიდენტმა. ღონისძიებას ესწრებოდნენ: თავდაცვის მინისტრი მინდია ჯანელიძე, სპორტისა და ახალგაზრდობის საქმეთა მინისტრი ლევან ყიფიანი, უშიშროების საბჭოს მდივანი ირინე იმერლიშვილი, პრეზიდენტის ადმინისტრაციის უფროსი დავით პატარაია, საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე, ამერიკის შეერთებული შტატების ელჩი რიჩარდ ნოლანდი, დიდი ბრიტანეთის ელჩი საქართველოში ალექსანდრა ჰოლ ჰოლი, პრეზიდენტის მრჩეველი თენგიზ ფხალაძე