ქვემო ქართლშიძალიან მნიშვნელოვანი ინფრასტრუქტრული პროექტი ხორციელდება. როგორც პრემიერ-მინისტრმა მარნეულში ”ძლიერი რეგიონი ძლიერი საქართველოსთვის“, - ახალი სამთავრობო პროექტის პრეზენტაცისას განაცხადა, ეს გახლავთ თბილისი-რუსთავის ავტომაგისტრალის მშენებლობა. ”ამ ეტაპზე შენდება პირველი და მესამე მონაკვეთები, რომელთა საერთო ღირებულება 88 მილიონ ლარზე მეტია. მიმდინარე წელს გამოცხადდება სამშენებლო ტენდერი მეორე მონაკვეთზე, რომლის საორიენტაციო ღირებულება 116 მილიონი ლარია. მინდა აღვნიშნო, რომ ავტომაგისტრალის მშენებლობაზე დასაქმებულია 250 კაცი. ჩვენი ქვეყნისთვის ყოველი ახალი სამუშაო ადგილი მნიშვნელოვანია და ამიტომ ჩვენ ხელს ვუწყობთ დ ა მივესალმებით ყოველი ახალი და სასარგებლო პროექტის განხორციელებას”, აღნიშნა მთავრობის მეთაურმა.
ირაკლი ღარიბაშვილის ინფორმაციითვე, მიმდინარეობს მუშაობა იმაზე, რომ ქვემო ქართლს აღარ ჰქონდეს წყლით მომარაგების პრობლემა. უკვე დასრულებულია მარნეულში წყალსადენის ქსელის რეაბილიტაცია და წყალმომარაგებასთან დაკავშირებული სამუშაოები. პროექტის ღირებულება 700 ათასი ლარია.
”დაწყებულია ბოლნისის წყალმომარაგების სისტემის რეაბილიტაცია. ამასთანავე, მოხდება არსებული მრავალბინიანი საცხოვრებელი კორპუსების გამრიცხველიანება და ტანძია–ბოლნისის მაგისტრალური მილსადენის რეაბილიტაცია. უკვე მომავალ წელს, ამ პროექტის განხორციელების შედეგად, ბოლნისი უზრუნველყოფილი იქნება 18 - 24-საათიანი წყალმომარაგებით. ამ პროექტის განხორციელებაში ჩვენ გვეხმარება ევროპის საინვესტიციო ბანკი. პროექტის ღირებულება თითქმის 3.5 მილიონი ლარია.
მიმდინარე წელს ვგეგმავთ წალკის წყალმომარაგების სისტემის სარეაბილიტაციო სამუშაოების დაწყებასაც. ეს გახლავთ 3 მილიონ ლარზე მეტი ღირებულების პროექტი.
წელსვე იგეგმება თეთრიწყაროს წყალმომარაგების სისტემის რეაბილიტაცია. ამ პროექტის ღირებულება 2 მილიონზე მეტია.
ჩვენ მოვაგვარებთ ისეთ სასიცოცხლო პრობლემას ქვემო ქართლის მოსახლეობისთვის, რომელიც წლების განმავლობაში გადაუჭრელი რჩებოდა”- განმარტა პრემიერ-მინისტრმა.
ირაკლი ღარიბაშვილის თქმით, 2013-14 წლებში შეკეთდა 353,51 კმ საავტომობილო გზა. ჩატარდა ნაპირსამაგრი სამუშაოები და ამ მიმართულებით მუშაობა წელსაც გაგრძელდება.
”გარდა ამისა, რეგიონში ვახორციელებთ მყარი ნარჩენების მართვის პროექტებს, რაც მნიშვნელოვანია იმისათვის რომ ჩვენ, ჩვენმა ოჯახებმა, ჩვენმა მომავალმა თაობებმა ჯანსაღ გარემოში იცხოვროს”,- განაცხადა ღარიბაშვილმა.
