საქართველოს ფოსტის გენერალური დირექტორი ააიპ „საერთაშორისო გამჭვირვალობა - საქართველოს“ მიერ გამოქვეყნებული კვლევის საპასუხოდ განცხადებას ავრცელებს.
ლევან ჩიკვაიძის განცხადებით, „საერთაშორისო გამჭვირვალობა - საქართველოს“ მიერ 2015 წლის მარტში გამოქვეყნებული კვლევა - „საფოსტო მომსახურების ბაზარი საქართველოში“ არ ასახავს რეალობას და სავარაუდოდ, მიმართულია კომპანია „საქართველოს ფოსტის“ ბიზნეს რეპუტაციის შელახვისკენ. აღნიშნული ზიანს აყენებს „საქართველოს ფოსტას“, როგორც მსოფლიოს ერთიანი საფოსტო ქსელის შემადგენელი ნაწილის გამტარუნარიანობას.
განცხადებაში აღნიშნულია, რომ არაკომპეტენტურობით ან მიზანმიმართულად შერჩეული მცდარი მონაცემების კვლევისა და ანალიზის შედეგად მომზადებული დასკვნა „საერთაშორისო გამჭვირვალობა - საქართველოს“ მიერ მიწოდებულ იქნა ყველა საერთაშორისო წარმომადგენლობისთვის საქართველოში. ასეთი ქმედება სცილდება კონკრეტული კომპანიის, „საქართველოს ფოსტის“ დისკრედიტაციას და უფრო მეტიც, გავლენას ახდენს მთლიანად ქვეყნის საერთაშორისო რეიტინგზე.
„საქართველოს ფოსტის“ გენერალური დირექტორის განცხადებით, წარმოდგენილი კვლევა მომზადებულია საფოსტო სფეროს არმცოდნე პირის (პირების) მიერ, რომლის ინტერესსაც, სავარაუდოდ, წარმოადგენდა არა საქართველოს საფოსტო მომსახურების ბაზრის შესახებ რეალური სურათის შექმნა, არამედ გარკვეული ინტერესების ლობირების მიზნით „საქართველოს ფოსტის“ საქმიანი რეპუტაციის შელახვა.
ლევან ჩიკვაიძე მიმართავს „საერთაშორისო გამჭვირვალობა - საქართველოს“ ხელმძღვანელს ეკატერინე გიგაურს, გადახედოს გამოქვეყნებულ დასკვნას.
თავის მხრივ, დასკვნაში რეალობის ასახვისა და დაინტერესებული საზოგადოების ინფორმირების მიზნით, ლევან ჩიკვაიძე მზად არის ნებისმიერი ღია ფორმატის განხილვა/დისკუსიაში მონაწილეობის მისაღებად, მათ შორის მედიისა და ექსპერტების მონაწილეობით.
.
