1-ლი აპრილიდან 30 სექტემბრის ჩათვლით, დაუბეგრავი მინიმუმით მოსარგებლე პირების შემოსავლების სამსახურის ვებ-გვერდზე დეკლარაციის შევსება შეეძლებათ. ადამიანებს პირადი ნომრის მითითებით შეეძლებათ გაარკვიონ სარგებლობენ თუ არა დაუბეგრავი მინიმუმის გამოქვითვის უფლებით და დადასტურების შემთხვევაში უნდა მოახდინონ ელექტრონული დეკლარაციის შევსება. რაც შეეხება თანხის უკან დაბრუნებას, ის არსებული კანონმდებლობის მიხედვით, დეკლარაციის შევსებიდან 3 თვის ვადაში მოხდება.
როგოგორც ცნობილია, დაუბეგრავი მინიმუმის დაბრუნებას შეძლებენ ის პირები, რომელთა 2014 წელს მიღებული ერთობლივი შემოსავალი 6 000 ლარს არ აღემატება.
”სსიპ შემოსავლების სამსახური გაცნობებთ, რომ თუ თქვენ მიერ 2014 წელს მიღებული ერთობლივი შემოსავალი არ აღემატება 6 000 ლარს, უფლება გაქვთ შესაბამისი კალენდარული წლის მიხედვით ხელფასის სახით მიღებული დასაბეგრი შემოსავლიდან გამოქვითოთ დაუბეგრავი მინიმუმი - 1800 ლარი - და მოითხოვოთ აღნიშნულზე გადახდილი შესაბამისი საშემოსავლო გადასახადის თანხის დაბრუნება.
კერძოდ, თუ თქვენ მიერ 2014 წელს მიღებული ერთობლივი შემოსავალი 1800-დან 6000 ლარამდეა, მოცემულ შემთხვევაში უფლება გაქვთ მხოლოდ ხელფასის სახით მიღებული შემოსავლიდან დაიბრუნოთ 360 ლარი, ხოლო თუ 1800 ლარამდეა, დაბრუნებას ექვემდებარება (მხოლოდ ხელფასის სახით მიღებული შემოსავლიდან) კონკრეტული თანხის 20 პროცენტი”, აღნიშნულია შემოსავლების სამსახურის შეტყობინებაში, რომელიც უწყებამ დაუბეგრავი მინიმუმით მოსარგებლე პირთა საყურადღებოდ გაავრცელა.
შემოსავლების სამსახურში ამბობენ, რომ 2015 წლის 1 აპრილიდან 2015 წლის 30 სექტემბრის ჩათვლით, დაუბეგრავი მინიმუმით მოსარგებლე პირებს საშუალება აქვთ შეავსონ ელექტრონული დეკლარაცია.
”თუ თქვენ არ მიეკუთვნებით დაუბეგრავი მინიმუმით მოსარგებლე პირთა კატეგორიას, დეკლარაციაში პირადი ნომრის მითითების შემდგომ ვეღარ განაგრძობთ დეკლარაციის შევსებას და ამის შესახებ სისტემა გაცნობებთ.
დეკლარირება შესაძლებელია ინტერნეტის საშუალებით ან/და მითითებული საბანკო დაწესებულების მეშვეობით. ელექტრონული დეკლარაციის წარდგენის შემდგომ, თქვენ მიერ დეკლარაციაში მითითებულ საბანკო ანგარიშზე, დაგიბრუნდებათ დაუბეგრავი მინიმუმის შესაბამისი თანხა „დაუბეგრავი მინიმუმის გამოქვითვის შესახებ“ დეკლარაციის რეგისტრაციიდან 3 თვის განმავლობაში.
ამასთან, თუ თქვენ 2013 კალენდარული წლის მიხედვით ხელფასის სახით მიღებულ შემოსავალზე არ გისარგებლიათ დაუბეგრავი მინიმუმის გამოქვითვის უფლებით, შეგიძლიათ მიმართოთ შემოსავლების სამსახურს, არაუგვიანეს 2015 წლის 30 სექტემბრისა.
დამატებითი ინფორმაციის მიღების მიზნით, შეგიძლიათ დაუკავშირდეთ შემოსავლების სამსახურის სატელეფონო ცენტრს შემდეგ ნომერზე: (995 32)22 99 299 ან მოგვმართოთ ელექტრონულ ფოსტაზე info@rs.ge. ასევე, შეგიძლიათ გაეცნოთ შემოსავლების სამსახურის ვებ-გვერდზე www.rs.ge განთავსებულ ხშირად დასმულ კითხვებს”, აღნიშნულია სსიპ შემოსავლების სამსახურის შეტყობინებაში.
