მიმდინარე წლის 25 მარტს, ფინანსთა მინისტრი ნოდარ ხადური მთავრობის წევრებთან და დედაქალაქის მერთან ერთად თბილისის სამედიცინო უნივერსიტეტის საუნივერსიტეტო კლინიკის გახსნას დაესწრო.
თანამედროვე ლაბორატორიით, რადიოლოგიური დიაგნოსტიკისა და მაღალტექნოლოგიური სამედიცინო კვლევებისთვის საჭირო აპარატურით აღჭურვილი, 185 საწოლზე გათვლილი კლინიკა პრემიერ-მინისტრმა ირაკლი ღარიბაშვილმა დაათვალიერა.
დღესვე, ფინანსთა მინისტრმა მონაწილეობა მიიღო კვლევებისა და ინოვაციების საბჭოს სხდომის მუშაობაში, რომელიც პრემიერ-მინისტრის, ირაკლი ღარიბაშვილის თავმჯდომარეობით საუნივერსიტეტო კლინიკაში გაიმართა.
სხდომას ასევე ესწრებოდნენ ვიცე-პრემიერი ეკონომიკისა და მდგრადი განვითარების მინისტრი, გიორგი კვირიკაშვილი, განათლებისა და მეცნიერების მინისტრი თამარ სანიკიძე.
"სამინისტროებმა მივიღეთ გარკვეული დავალებები. გადაწყდა, რომ შეიქმნება სამუშაო ჯგუფები, რომლებიც იმუშავებენ იმაზე, თუ როგორ წარმოგვიდგენია მომავალში მეცნიერების და ტექნოლოგიების განვითარება, მათ შორის, მათი კომერციალიზაციის მიზნით", - განაცხადა ფინანსთა მინისტრმა.
კვლევებისა და ინოვაციების საბჭო მთავრობის დადგენილებით შეიქმნა და მის შემადგენლობაში შედიან საკანონმდებლო და აღმასრულებელი ხელისუფლების წარმომადგენლები, ცნობილი ქართველი მეცნიერები და ბიზნესის წარმომადგენლები.
