აჭარის სამთავრობო დელეგაცია, 25-27 მარტს ოფიციალური ვიზიტით პოლონეთში, სილეზიის სავოევოდოში მიემგზავრება, სადაც საერთაშორისო თანამშრომლობის კომისიის მესამე სხდომა გაიმართება.
ვიზიტის ფარგლებში სილეზიის სავოევოდოს მარშალის ოფისსში გაიმართება შეხვედრები სავოევოდოს ხელმძღვანელ პირებთან. შეხვედრაზე განიხილება მხარეებს შორის 2014 წელს ჯანდაცვის, განათლების, ეკონომიკის, დასაქმების და ტურიზმის სფეროებში განხორციელებული პროექტები. ასევე ხელი მოეწერება 2015 წლის თანამშრომლობის გეგმას. დაგეგმილია სილეზიის უნივერსიტეტში სტუმრობა.
ვიზიტისას აჭარის მთავრობას წარმოადგენს რეგიონის ჯანმრთელობისა და სოციალური დაცვის მინისტრი ნუგზარ სურმანიძე, ფინანსთა და ეკონომიკის მინისტრის მოადგილე რამაზ ბოლქვაძე, აჭარის ა/რ მთავრობის საერთაშორისო ურთიერთობათა დეპარტამენტის უფროსი- ხათუნა ნაყეური და რეგიონის ტურიზმისა და კურორტების დეპარტამენტის ტურისტული სააგენტოს დირექტორი-სოფო ლაზიშვილი.
სილეზიის სავოევოდოსა და აჭარის ავტონომიურ რესპუბლიკას შორის თანამშრომლობა 2011 წელს თანამშრომლობისა და მეგობრული ურთიერთობების განვითარების შესახებ გაფორმებული ხელშეკრულების საფუძველზე გრძელდება.
