საქართველო-ისრაელის ბიზნეს პალატის პრეზიდენტის, იციკ მოშეს ინიციატივას, საქართველოს მთავრობასა და ისრაელის ინვესტორებსა შორის კომუნიკაციისთვის საკონტაქტო პირი გამოიყოს, ირაკლი ღარიბაშვილი სოციალურ ქსელში გამოეხმაურა. პრემიერის განცხადებით, ებრაელი ინვესტორების საკითხის შესწავლა მან უკვე დაავალა ბიზნეს-ომბუდსმენს და საკითხი უახლოეს ხანებში გადაწყდება. საქართველო-ისრაელის ბიზნეს პალატის პრეზიდენტი საქართველოს მთავრობაში ისეთი პირის გამოყოფას მოითხოვს, რომელსაც ყოველგვარი ბიუროკრატიული პროცედურების გარეშე შეეძლება საჭირო უწყებებს ინვესტორების პრობლემები და ინტერესები გააცნოს. მოშეს განმარტებით, ეს მეთოდი საკმაოდ წარმატებული და აპრობირებულია.
