ბათუმის სახელმწიფო საზღვაო აკადემიის დელეგაციამ, რომელსაც რექტორი ირაკლი შარაბიძე ხელმძღვანელობდა, თურქმენეთში 5 დღიანი ვიზიტი დაასრულა. სამუშაო ვიზიტის ფარგლებში ბათუმის საზღვაო აკადემიის ხელმძღვანელობამ აშხაბადში მნიშვნელოვანი შეხვედრები გამართა თურქმენეთის განათლების სამინისტროსა და თურქმენეთის საზღვაო ტრანსპორტის უწყების წარმომადგენლებთან.
თურქმენეთის განათლების მინისტრის მოადგილესთან, ბაირამგულ ორაზდურდიევასთან შეხვედრისას განხილვის მთავარი თემა უმაღლესი და საშუალო პროფესიული სასწავლო დაწესებულებების სფერო იყო. მინისტრის მოადგილე ბათუმის საზღვაო აკადემიის საგანმანათლებლო შესაძლებლობებით დაინტერესდა. შეხვედრაზე ირაკლი შარაბიძემ მინისტრის მოადგილეს ბათუმის საზღვაო აკადემიაში არსებული სასწავლო პროგრამები გააცნო.
18 მარტს, დელეგაცია თურქმენეთის საპორტო ქალაქ თურქმენბაშში გაემგზავრა, სადაც შეხვედრა გაიმართა თურქმენეთის საზღვაო და სამდინარეო ტრანსპორტის სახელმწიფო სამსახურის თავმჯდომარესთან. რუსტამ კუტლიევთან შეხვედრას ასევე ესწრებოდა ნაოსნობის ზედამხედველობის ადმინისტრაციის უფროსი ბეგენჩგელდი ჰანმამედოვი. შეხვედრაზე ბათუმის საზღვაო აკადემიის რექტორმა საზღვაო აკადემიის შეთავაზებებზე, საზღვაო სფეროს სპეციალისტთა მომზადებასა და მეზღვაურთა გადამზადების სფეროში მიმდინარე პროექტებზე ისაუბრა.
თურქმენეთის საზღვაო და სამდინარეო ტრანსპორტის სახელმწიფო სამსახურის თავმჯდომარემ, რუსტამ კუტლიევმა საზღვაო აკადემიაში მოქმედი მეზღვაურთა სასწავლო და საწვრთნელი კურსებისადმი დაინტერესება გამოხატა და იმედი გამოთქვა, რომ სამომავლოდ თანამშრომლობა გაღრმავდება. შეხვედრაზე აღინიშნა, რომ საზღვაო აკადემიაში თურქმენი მოქალაქეები გემთწამყვანი და გემთმექანიკური მიმართულებით გადაემზადებიან.
აპრილის ბოლოსთვის თურქმენეთის წარმომადგენლობა ურთიერთთანამშრომლობის მემორანდუმს მოაწერეს ხელს და იმ სტუდენტთა ზუსტ რაოდენობას განსაზღვრავს, რომლებიც უკვე სექტემბრიდან სწავლას ბათუმის საზღვაო აკადემიის საბაკალავრო პროგრამებზე დაიწყებენ.
