ბიზნესის სტიმულირებისთვის ”საგადასახადო კოდექში” ცვლილებები შედის, რომლის მიხედვითაც, მოგების გადასახადის გადახდისგან თავისუფლდება საწარმოს მიერ მიღებული მოგების ის ნაწილი, რომლის რეინვესტირებაც მეწარმე შესაბამისი საგადასახადო წლის დასრულებიდან 3 წლის განმავლობაში განახორციელებს.
კანონპროექტის ინიციატორია პარლამენტარი ზურაბ ტყემალაძე და როგორც კანონპროექტის განმარტებით ბარათშია აღნიშნული, ინიციატივის მიზანს წარმოადგენს ”საგადასახადო კოდექსის” შესაბამისად საწარმოს სტატუსის მქონე პირების, გათავისუფლებას მოგების გადასახადით დაბეგვრისგან, მოგების გადასახადის იმ ნაწილში რომლიც მიმართული იქნება რეინვესტირებისათვის, რაც გარკვეულწილად მათ შეუქმნის შეღავათიან გარემოს, მისცემს ბიზნესის განვითრებისა და გაფართოების სტიმულს.
”საგადასახადო კოდექსის” მოქმედი 99-ე მუხლის პირველი ნაწილის „ვ“ და „რ“ ქვეპუნქტები ითვალისწინებენ სასოფლო-სამეურნეო და სამედიცინო სფეროში მოქმედი საწარმოების გათავისუფლებას მოგების გადასახადისაგან იმ ნაწილში, რომელიც მიმართული იქნება რეინვესტირებაზე. პროექტის მიხედვით კი სასოფლო-სამეურნეო და სამედიცინო სფეროში მომუშავე საწარმოების გარდა შეღავათი ყველა ტიპის მოქმედ საწარმოზე გავრცელდება.
ზურაბ ტყემალაძის აზრით, კანონპროექტის მიღება გამოიწვევს პოზიტიურ ფინანსურ შედეგებს იმ პირთათვის, რომელთა მიმართაც გავრცელდება აღნიშნული ნორმები.
