ბათუმის საფეხბურთო სტადიონს ესპანური კომპანია „iberproex engineering & project management” ააშენებს. 22 წევრიანმა სპეციალურმა კომისიამ საუკეთესო 11 სხვადასხვა პროექტიდან შეარჩია.
პროექტის მიხედვით სტადიონის ტერიტორიაზე სპორტული ტერიტორია, ფრენბურთის მოედანი, სარეკრეაციო ტერიტორია,რესტორნები,მაღაზიები, სავაჭრო ობიექტები და საინფორმაციო ცენტრები მოეწყობა. სტადიონზე ასევე VIP ადგილები, მედიის სამუშაო ადგილები, სასწრაფო სამედიცინო დახმარების მანქანები განთავსდება.სტადიონის ავტოსადგომი 2000 მანქანას დაიტევს.
სტადიონს მრავალფუნქციური დატვირთვა ექნება და სპორტული ღონისძიებების გარდა კონცერტებისა და სხვა ღონისძიებების გამართვა იქნება შესაძლებელი.
სტადიონის ფორმა, კერძოდ ტალღოვანი ზოლები,დაკლაკნილი ხვეულებით, მდინარე ჭოროხის შესართავს და შავი ზღვის ტალღებს ასახავს. გადასვლა წითელიდან ლურჯზე კი ბათუმსა და საქართველოს წარმოადგენს.
მიწის ნაკვეთის ფართობი - 8,4 ჰექტარია,საიდანაც:
· სტადიონის ფართობი: 39 000 კვ.მეტრი
· საცალფეხო გზა 42 100 კვ.მეტრი
· ფრენბურთის პავილიონი: 3600 კვ.მეტრი
სპორტული მოედანზე შემდეგი შეჯიბრებები ჩატარდება:
· მძლეოსნობა IAAF-ს სტანდარტი
· ფეხბურთი UEFA-ს და FIFA-ს სტანდარტები
გამარჯვებული პროექტი აჭარის მთავრობის თავმჯდომარემ საზოგადოებას ყინულის სასახლეში გამართულ ღონისძიებაზე გააცნო. აჭარის ფინანსთა და ეკონომიკის მინისტრმა საზოგადოებას თავის გამოსვლაში განსაკუთრებული დღე მიულოცა და რეგიონისთვის სტადიონის მშენებლობის მნიშვნელობაზე ისაუბრა.
„ვულოცავ ბათუმელებს,რეგიონში მცხოვრებლებს და ყველა იმ ადამიანს, ვინც წლების განმავლობაში ბათუმში სტადიონის აშენებას ელოდა. დღეს ჩვენ ყველანი ისტორიული პროცესის დაწყების მონაწილენი ვართ.სტადიონის ერთი კონკრეტული პროექტის შერჩევა ძალიან დიდი პასუხისმგებლობა იყო ჩვენთვის. გამარჯვებული პროექტი დარწმუნებული ვარ სპორტის გულშემატკივართა მოწონებას დაიმსახურებს და ბათუმის საფეხბურთო სტადიონი ქალაქის ერთ-ერთი სავიზიტო ბარათი გახდება.
სტადიონი სამომავლოდ არაერთ საერთაშორისო შეჯიბრებას უმასპინძლებს, რაც რეგიონში არამხოლოდ სპორტის,არამედ ტურიზმის სექტორსაც გააძლიერებს.აღნიშნულ ტერიტორიაზე სხვადასხვა დანიშნულების ობიექტების ფუნქციონირება, ბუნებრივია სამომავლოდ რეგიონის ეკონომიკაზეც დადებითად აისახება“ - განაცხადა დავით ბალაძემ.
გამარჯვებულ პროექტის პრეზენტაციას აჭარის განათლების,კულტურისა და სპორტის მინისტრი გიორგი თავამაიშვილი, ქალაქ ბათუმის მერი გიორგი ერმაკოვი და სხვა ოფიციალური პირები, სპორტსმენები, გულშემატკივრები და საზოგადოების სხვა წარმომადგენლები დაესწრნენ.
სტადიონის საბოლოო პროექტი 5 თვეში მზად იქნება, რის შემდეგაც მშენებლობაზე ტენდერი გამოცხადდება. სტადიონის მშენებლობა მიმდინარე წელს დაიწყება.
