16-19 მარტს ქალაქ მაიამში საკრუიზო ტურიზმის საერთაშორისო გამოფენა "Cruise Shipping Miami" იმართება. გამოფენაზე აჭარის ტურიზმისა და კურორტების დეპარტამენტი ცალკე სტენდში იქნება წარმოდგენილი და 4 დღის მანძილზე გაუწევს პოპულარიზაციას ბათუმს, როგორც საკრუიზო ტურიზმის საინტერესო დანიშნულებას. გამოფენის ფარგლებში გაიმართება საქმიანი შეხვედრები შავი ზღვის პარტნიორ პორტებთან. ტურიზმის დეპარტამენტის თავმჯდომარე და მისი პირველი მოადგილე ჩაატარებენ სპეციალურ პორეზენტაციას ბათუმის საკრუიზო ტურიზმის სტრატეგიული გეგმების და პოტენციალის შესახებ, რომელსაც დაესწრება წამყვანი საკრუიზო კომპანიების ხელმძღვანელები.
საკრუიზო ტურიზმის განვითარების ხელშეწყობის მიზნით აჭარის მთავრობის მხარდაჭერითა და ტურიზმის დეპარტამენტის ორგანიზებით სხვადასხვა ღონისძიება ხორციელდება. უკვე მზად არის საკრუიზო ტურიზმის განვითარების სტრატეგიის დოკუმენტის პირველი ნაწილი. უახლოეს მომავალში დეპარტამენტი სწორედ ამ დოკუმენტის მიხედვით იხელმძღვანელებს. საკრუიზო ტურიზმის განვითარების სტრატეგიაზე მუშაობს დიდი ბრიტანეთის შპს „G. P. Wild International“-ის წარმომადგენელი ექსპერტი პიტერ უაილდი, რომელმაც ბათუმში უკვე გამართა მნიშვნელოვანი შეხვედრები ტურიზმის კერძო და სახელმწიფო უწყებების წარმომადგენლებთან და შეისწავლა რეგიონში ამ მიმართულებით არსებული მდგომარეობა.
ტურიზმის დეპარტამენტი საკრუიზო ტურიზმის ყველაზე მსხვილ გამოფენაში მონაწილეობით ხელს უწყობს ბათუმის შესახებ ცნობადობის ამაღლებას. გარდა ამისა, დეპარტამენტი ყოველწლიურად სარეკლამო ხასიათის სტატიას აქვეყნებს საკრუიზო მიმართულებით ყველაზე პოპულარულ ჟურნალში „Seatrade Cruise Review”. ჟურნალი მსოფლიო მასშტაბით ვრცელდება საკრუიზო ტურიზმთან დაკავშირებულ ისეთ ღონისძიებებზე, როგორებიცაა Cruise Shipping Miami, Seatrade Med, Seatrade Europe, Cruise Shipping Asia Pacific და ა.შ.
უპრეცედენტოა საკრუიზო ტურიზმის სტატისტიკური მონაცემები: 2014 წელს 33 საკრუიზო გემით 14 793 ტურისტი შემოვიდა ბათუმში, რაც 186,5 %-ით აღემატება 2013 წელს საკრუიზო გემებით შემოსული ტურისტების რაოდენობას (16 გემი, 5162 ტურისტი 2013 წელს).
