საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი თურქეთის ეკონომიკის მინისტრთან, ნიჰათ ზეიბექჩისთან და აზერბაიჯანის ეკონომიკისა და მრეწველობის მინისტრთან, შაჰინ მუსტაფაევთან ერთად ბიზნეს ფორუმს დაესწრო, რომელიც ქალაქ ბათუმში, სასტუმრო „შერატონში“ გაიმართა. ფორუმი მისასალმებელი სიტყვით საქართველოს პრემიერ-მინისტრმა, ირაკლი ღარიბაშვილმა გახსნა.
ფორუმზე ვრცელი მოხსენებით წარდგა ვიცე-პრემიერი, საქართველოს ეკონომიკისა და მდგრადი განვითარების მინისტრი გიორგი კვირიკაშვილი და ისაუბრა იმ სავაჭრო-ეკონომიკურ ურთიერთობებზე, რომლებიც საქართველოს, აზერბაიჯანსა და თურქეთს შორის არსებობს და კიდევ უფრო ვითარდება. ვიცე-პრემიერმა ფორუმის მონაწილეებს გააცნო საქართველოში მიმდინარე ეკონომიკური პროცესები, ასევე საქართველოს მიღწევები სხვადასხვა საერთაშორისო სარეიტინგო კომპანიების მიხედვით და განსაკუთრებული ხაზგასმით აღნიშნა იმ პროექტების მნიშვნელობა, რომლებსაც თურქული და აზერბაიჯანული კომპანიები ახორციელებენ საქართველოში. ,,როგორც მოგეხსენებათ უკანასკნელი ათწლეულის განმავლობაში აზერბაიჯანი და თურქეთი საქართველოს უმსხვილეს სავაჭრო და საინვესტიციო პარტნიორებს შორის არიან. ორივე ქვეყნის ბიზნესი დიდი წარმატებით მუშაობს საქართველოში, იყენებს შესაძლებლობებს, რომლებსაც სთავაზობს საქართველო და თავის მხრივ წვლილი შეაქვს საქართველოს ეკონომიკურ განვითარებაში. საქართველოს, აზერბაიჯანს და თურქეთს აქვთ საკმარისი რესურსი, განაგრძონ წარმატებულად განვითარება. ჩვენს ქვეყნებს აქვთ პოტენციალი, რეგიონი აქციონ საკვანძო ფიგურად აღმოსავლეთისა და დასავლეთის ეკონომიკურ ურთიერთობებში, რაც თავის მხრივ მიმართულია მათი განვითარებისკენ. ის მსხვილი პროექტები, რომლებსაც ჩვენ ერთობლივად ვახორციელებთ, სწორედ ამ მიზანს ემსახურება და მათ წარმატებულ მომავალში ყველანი დარწმუნებულნი ვართ - აღნიშნა გიორგი კვირიკაშვილმა.
ფორუმში ქართული, თურქული და აზერბაიჯანული კომპანიების 300 მეტი წარმომადგენელი მონაწილეობდა სოფლის მეურნეობის, ფინანსების, ენერგეტიკის, საკვები პროდუქტების გადამუშავების, მშენებლობის, უძრავი ქონების, ტელეკომუნიკაციების, ტექსტილისა და მრეწველობის სფეროებიდან. ფორუმის ფარგლებში გაიმართა B2B შეხვედრებიც, სადაც სამივე ქვეყნის ბიზნეს კომპანიების წარმომადგენლებმასამომავლო თანამშრომლობის საკითხები განიხილეს.
საქართველო-თურქეთი-აზერბაიჯანის ერთობლივი ბიზნეს ფორუმი ოსაქართველოს ეკონომიკისა და მდგრადი განვითარების სამინისტროსა და ეროვნული საინვესტიციო სააგენტოს ერთობლივი ორგანიზებით ჩატარდა. ფორუმის მხარდამჭერები იყვნენ საქართველოს სავაჭრო სამრეწველო პალატა, აზერბაიჯანის ექსპორტისა და ინვესტიციების ხელშეწყობის ფონდი, საქართველოს დამსაქმებელთა ასოციაციია და თურქეთის საგარეო ეკონომიკური ურთიერთობების საბჭო.
