საქართველოს რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი კიევში, ვიზიტის ფარგლებში, უკრაინის რეგიონული განვითარების, მშენებლობისა და კომუნალური მეურნეობის მინისტრის მოადგილეს ვიაჩესლავ ნეგოდას შეხვდა.
შეხვედრაზე რეგიონული განვითარებისა და ადგილობრივი თვითმმართველობის საკითხებზე, ევროკავშირთან ინტეგრაციის მიმართულებით ქვეყნების მიერ გადადგმულ ნაბიჯებსა და სამომავლო პერსპექტივებზე ისაუბრეს. ასევე აღინიშნა, რომ ამ მიმართულებებით ორი ქვეყნის უწყებებს საერთო ხედვები და ინტერესები გააჩნიათ. თენგიზ შერგელაშვილი და ვიაჩესლავ ნეგოდა სამინისტროებს შორის არსებული თანამშრომლობის გაძლიერებაზე და ცოდნისა და გამოცდილების გაზიარებაზე შეთანხმდნენ.
უკრაინის რეგიონული განვითარების, მშენებლობისა და კომუნალური მეურნეობის მინისტრის მოადგილემ ქართველ კოლეგას რთულ მდგომარეობაში მყოფი მისი ქვეყნის მხარდაჭერისათვის მადლობა გადაუხადა. მან იმედი გამოთქვა, რომ სამინისტროებს შორის დაწყებული თანამშრომლობა ნაყოფიერი იქნება ორივე ქვეყნის განვითარების, ევროკავშირთან შემდგომი ინტეგრაციის, ქართველი და უკრაინელი ხალხის მეგობრობის შემდგომი განმტკიცებისათვის.
