სოფლის მეურნეობის მინისტრი ოთარ დანელია ადასტურებს, რომ სოფლის მეურნეობის სამინისტროს ბიუჯეტის ათვისების კუთხით დაგვიანება აქვს, თუმცა მინისტრის განმარტებით, ეს ძირითადად დონორი ორგანიზაციების მიერ დაწყებული პროექტების ნაწილში ხდება.
”ათვისებაში არის დაგვიანება, ეს გახლავთ ძირითადად დონორი ორგანიზაციების მიერ დაწყებული პროექტების ნაწილში და მხოლოდ და მხოლოდ დაკავშირებულია მათ შიდა პროცედურებთან. ანუ საბიუჯეტო ნაწილში არ არის არანაირი ჩამორჩენა მხოლოდ და მხოლოდ არის ტექნიკური ნიუანსების გამო შიდა პროცედურების ნაწილში, რომელსაც დავაკორექტირებთ”, - აცხადებს ოთარ დანელია.
შეგახსენებთ, რომ პრემიერ-მინისტრმა მთავრობის სხდომაზე დღეს განათლების, ჯანდაცვის, სოფლის მეურნეობისა და ენერგეტიკის სამინისტროებს ხარჯვით ნაწილში გააქტიურებისკენ მოუწოდა. ირაკლი ღარიბაშვილის განცხადებით, დაფინანსების არსებობის მიუხედავად, ვერ ხორციელდება პროექტები რეგიონებშიც.
