,,2017 წელს საქართველო ევროპისა და აზიის მესამე სამთო კურორტების კონფერენციას უმასპინძლებს, რომელიც გაეროს მსოფლიო ტურიზმის ორგანიზაციის ეგიდით იმართება”, _ ამის შესახებ, მთავრობის სხდომაზე ეკონომიკისა და მდგრადი განვითარების მინისტრმა გიორგი კვირიკაშვილმა განაცხადა.
აღნიშნული კონფერენცია საერთაშორისო ფართომასშტაბიანი ფორუმია და მასზე წარმოდგენილი იქნება ევროპისა და აზიის ცნობილი და განვითარებადი ზაფხულისა და ზამთრის კურორტები.
ღონისძიებას სამასზე მეტი სამთო კურორტის ხელმძღვანელი, ასევე მსოფლიოს ტურიზმის პრეზიდენტი ტალებ რიფაი და სხვა ოფიციალური პირები დაესწრებიან.
,,ევროპისა და აზიის რიგით მესამე სამთო კურორტების კონფერენცია განსაკუთრებით მნიშვნელოვანია გამოცდილების გაზიარების კუთხით, თუ როგორია თანამედროვე მიდგომები და ტენდენციები საბაზო და ტურისტული ინფრასტრუქტურის დაგეგმარების კუთხით, ასევე რა ახალი ტურისტული პროექტები ვითარება სამთო კურორტებზე სეზონის გახანგრძლივების მიმართულებით და რა ინოვაციური მეთოდები გამოყენებია სამთო კურორტების საერთაშორისო ბაზარზე პოზიციონირებისთვის. კონფერენცია ასევე წამოადგენს ძალიან კარგ შესაძლებლობას ინვესტორთა მოსაზიდად, ბიზნესის ამ სფეროში”, -განაცხადა კვირიკაშვილმა.
შეგახსენებთ, რომ ევროპისა და აზიის სამთო კურორტების კონფერენცია მიმდინარე წლის 14-16 ოქტომბერს გაიმართება სამხრეთ კორეაში ქალაქ ულსანში, სადაც ქართული მხარე გამართავს პრეზენტაციას 2017 წლის მასპინძელი ქვეყნის შესხებ.
