"ეროვნული ფორუმის" ერთ-ერთი ლიდერის, გუბაზ სანიკიძის აზრით, ბიშკეკის სცენარის თბილისში გამეორება არ შეიძლება.
"ყირგიზეთში განვითარებული მოვლენების საქართველოში გამეორება არ შეიძლება. ისედაც ძალიან ბევრი რესურსი არსებობს იმისა, რომ ვაიძულოთ ეს ხელისუფლება წავიდეს დათმობაზე და ქვეყნისთვის სასიკეთო საქმე გაკეთდეს", - განაცხადა სანიკიძემ დღეს, "პრაიმ-ტაიმის" პრესკლუბში, ჟურნალისტებთან შეხვედრისას.
მისივე განმარტებით, ქვეყნის ხელისუფლების კარგი შანსი ოპოზიციას გასული წლის აპრილის აქციების დროს ჰქონდა, მაგრამ იმის გამო, რომ "საზოგადოება უფრო აღმოჩნდა მზად ცვლილებებისთვის, ვიდრე ოპოზიცია, ეს ვერ მოხერხდა".
"იგივე შეცდომების დაშვება არ შეიძლება. ჩვენთან ასეა - რაღაცას დავიწყებთ, არ გამოგვივა და მაშინვე ბრძოლის განსხვავებულ ფორმას ვეძებთ. ამიტომაც ოპოზიციის ერთმა ნაწილმა ადგილობრივ არჩევნებში მონაწილეობა გადაწყვიტა, მეორე კი იძახის "ბიშკეკი" უნდა მოვაწყოთო. არც ერთია სწორი და არც მეორე. ჩვენ პრობლემა გვაქვს უკიდურესობის - ან ერთ ფრთაზე ვართ, ან მეორეზე, შუაში გავლა უნდა ვისწავლოთ", - განმარტა სანიკიძემ.
