ოკუპირებული აფხაზეთის საგარეო საქმეთა სამინისტრო აფხაზური დელეგაციისთვის ბელგრადში დროშის ჩამორთმევის ფაქტს განიხილავს და აღნიშნავს, რომ ეს იყო, საქართველოს და მისი მომხრეების მხრიდან, საერთაშორისო ღონიძიებაზე აფხაზეთის მონაწილეობის მნიშვნელობის ნიველირება.
შეგახსენებთ, რომ სერბეთის დედაქალაქში მიმდინარე 37-ე საერთაშორისო ტურისტულ გამოფენა Sajam Fair- ზე მსოფლიოს 50 ქვეყნის დელეგაციებს შორის ოკუპირებული აფხაზეთის სავაჭრო-სამრეწველო პალატაც მონაწილეობდა, მაგრამ საქართველოს და ევროპის სხვადასხვა ქვეყნის წარმომადგენელთა მიერ გამოთქმული პროტესტის შედეგად, გამოფენის ორგანიზატორებმა აფხზური სტენდიდან მათი დროშა ჩამოიღეს.
,,საქართველოს მხრიდან საზღვარგარეთ აფხაზეთის წარმომადგენლობაზე ზეწოლის განუწყვეტელი მცდელობა ხმამაღლა არის დასაგმობი.
გაოცებას იწვევს გამოფენის ორგანიზატორთა მიერ საქართველოს წარმომადგენელთა უღირსი აქციების მიმართ სოლიდარობაც.
აფხაზეთი, როგორც სუვერენული, დამოუკიდებელი სახელმწიფო, მისი არაკეთილმოსურნეების მხრიდან ღია დესტრუქციული ნაბიჯების მიუხედავად, დანარჩენ მსოფლიოსთან საერთაშორისო კონტაქტების დამყარებას მომავალშიც აპირებს.” - აცხადებს ოკუპირებული აფხაზეთის საგარეო საქმეთა სამინისტრო.
