ჯანმრთელობის დაცვისა და სოციალურ საკითხთა კომიტეტის თავმჯდომარის პირველი მოადგილე მირიან წიკლაური „შვილად აყვანისა და მინდობით აღზრდის შესახებ“ კანონში განსახორციელებელ ცვლილებებთან დაკავშირებით საკანონმდებლო ჯგუფს შეხვდა.როგორც შეხვედრაზე განმარტეს, კანონპროექტის მიზანია, ხელი შეუწყოს ბავშვის ოჯახურ გარემოში აღზრდის უპირატესი უფლების განხორციელებას და ბავშვის საუკეთესო ინტერესების დაცვას შვილად აყვანისას და მინდობით აღზრდისას.
მისივე თქმით, კანონპროექტი მშვილებლისთვის ასაკობრივი შეზღუდვების შემოღებას, შეღავათებს იმ მშვილებლებისთვის, რომლებიც განსაკუთრებული საჭიროებების მქონე ბავშვს იშვილებენ, მშვილებელი კანდიდატებისთვის მოსამზადებელ კურსებს და შვილად აყვანის შემდგომ მონიტორინგს ითვალისწინებს.
ასევე, იცვლება მშვილებელთა შერჩევის პრინციპი და შემოღებულ იქნება მშვილებელთა შერჩევის უფრო დაზუსტებული კრიტერიუმები.
სამუშაო შეხვედრაზე აღნიშნეს, რომ მოქმედ კანონთან შედარებით, კანონპროექტში უფრო დეტალურადაა გაწერილი საერთაშორისო შვილად აყვანის პროცედურებიც.
„კანონპროექტის ერთ-ერთი მუხლი პირდაპირ მიშვილებას შეეხება და ამასთან დაკავშირებით, იქნება ცვლილებებიც“, - განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარის პირველმა მოადგილემ.
სამუშაო შეხვედრას დარგის ექსპერტებთან ერთად, „UNICEF”- ის, “Save the Children”-ის და “EveryChild”-ის წარმომადგენლები დაესწრნენ.
