ქართულ პატრიოტულ ბანაკებში სამცხე-ჯავახეთის სომეხი ეროვნების ახალგაზრდებიც დაისვენებენ. ამის შესახებ განცხადება პარლამენტის ადამიანის უფლებათა დაცვის კომიტეტის თავმჯდომარემ გია არსენიშვილმა დღეს პარლამენტში "ეთნიკური უმცირესობებით დასახლებულ სამცხე ჯავახეთის რეგიონში საჯარო პოლიტიკის შემუშავების პროცესის ხელშეწყობის" მონაწილეებთან შეხვედრისას გააკეთა.
შეხვედრაზე ისაუბრეს სამცხე-ჯავახეთში არსებულ პრობლემებზე, მათ შორის ეთნიკური უმცირესობების პრობლემებზე. როგორც აღინიშნა, მთავარ პრობემას ქმნის ის, რომ სომეხმა ახალგაზრდებმა არ იციან სახელმწიფო ენა. ამ კონტექსტში დადებითად იქნა შეფასებული სახელმწიფოს ხელშეწყობა საქართველოს უმაღლეს სასწავლებლებში სომეხი ახალგაზრდებისათვის ადგილების გამოყოფის შესახებ. თუმცა როგორც სომხური სკოლის ქართული ენის მასწავლებელმა ქეთევან ნასყიდაშვილმა აღნიშნა, უნდა არსებობდეს სხვა მოტივაციები და პროგრამებიც, რაც ახალგაზრდებს ენის სწავლის მოტივაციას და შესაძლებლობას მისცემს.
მისი თქმით, სომხურ გარემოში მხოლოდ სკოლაში ქართული ენის სწავლებით ენის ათვისება რთულია. სწორედ ამიტომ იგი მიიჩნევს, რომ სომეხი და ქართველი ახალგაზრდები უნდა დაახლოვდნენ. არსენიშვილი მიიჩნევს, რომ სომეხი ახალგაზრდების პატრიოტულ ბანაკებში უფრო ინტენსიური დასვენება ხელს შეუწუობს მათ მიერ ქართული ენის სწავლას და აცხადებს, რომ ეს საკითხი ხელისუფლების უმაღლეს დონეზე იქნება დასმული, რათა აქცენტი პატრიოტული ბანაკების მუშაობასთან დაკავშირებით ამ მიმართულებით გაკეთდეს.
