საქართველოს საავტომობილო გზების დეპარტამენტის თავმჯდომარე რამაზ ნიკოლაიშვილი იმერეთის რეგიონში, მოწამეთას მონასტრამდე მისასვლელი საავტომობილო გზის 2 კმ-იან მონაკვეთზე სარეაბილიტაციო სამუშაოებს დაათვალიერებს. მოწამეთას სამონასტრო კომპლექსი ქუთაისიდან ექვსი კილომეტრის დაშორებით, მდინარე წყალწითელას ხეობაში მდებარეობს.
აღნიშნულ მონაკვეთზე სარეაბილიტაციო სამუშაოები ითვალისწინებს გზის სავალ ნაწილზე ასფალტ-ბეტონის დაგების სამუშაოებს. ასევე, ხელოვნური ნაგებობების, სანიაღვრე სისტემებისა და კიუვეტების (სადრენაჟო არხები) აღდგენას. ამჟამად მიმდინარეობს მიწის ვაკისის, გზის საფუძვლის და კიუვეტების მოწყობის სამუშაოები.
მოწამეთას მონასტერი საქართველოს ისტორიის ერთ-ერთი უძველესი და მნიშვნელოვანი ძეგლია. წყალწითელას ხეობა უდიდეს როლს ასრულებს საქართველოს ეკონომიკურ, ტურისტულ და კულტურულ ცხოვრებაში. ბოლო რამდენიმე წელია, საქართველოს მთავრობის ერთ-ერთი მთავარი პრიორიტეტი ქვეყანაში სწორედ, ტურიზმის განვითარების ხელშეწყობაა.
სარეაბილიტაციო სამუშაოებს სახელმწიფო ბიუჯეტის დაფინანსებით ასრულებს ქართული კომპანია შ.პ.ს. ,,ვერელი+". აღნიშნული მონაკვეთის რეაბილიტაცია მიმდინარე წელს დასრულდება. სამუშაოების ღირებულება 1 მლნ 352 ათას ლარს შეადგენს.
