საქართველოს მთავრობა USAID-თან პროექტის - „დემოკრატიული მმართველობის ინიციატივა" ფარგლებში ითანამშრომლებს. პროექტის ბიუჯეტი 9 მილიონი დოლარია და მისი მიზანია საქართველოში მმართველობის გამჭვირვალობის, ანგარიშვალდებულებისა და ეფექტურობის გაძლიერება.
თანამშრომლობა საჯარო ადმინისტრირების გაუმჯობესების მიმართულებით, მოსახლეობისთვის სახელმწიფო სერვისების მიწოდების ხარისხს გააუმჯობესებს.
პროექტის შესახებ USAID-ის წარმომადგენლები და მთავრობის ადმინისტრაციის ხელმძღვანელობა დღევანდელ შეხვედრაზე ისაუბრებენ, რომელიც მთავრობის ადმინისტრაციაში 16:00 საათზე გაიმართება.
ამერიკის შეერთებული შტატები მხარს უჭერს საქართველოს მისწრაფებას, გააძლიეროს დემოკრატიული მმართველობა, ანგარიშვალდებულება, რაც ხელს შეუწყობს სახელმწიფოს ეფექტურ ფუნქციონირებას.
საქართველოს მთავრობა აშშ-ის საერთაშორისო განვითარების სააგენტოსთან თანამშრომლობდა პროგრამის - „დემოკრატიული მმართველობა საქართველოში" (G3) ფარგლებში, რომელიც წარმატებით განხორციელდა. პროგრამის ძირითადი მიმართულებები იყო - ადგილობრივ და ცენტრალურ სახელისუფლებო დონეებზე დემოკრატიულ მმართველობასთან დაკავშირებული გამოწვევები და საჯარო კომუნიკაციის სივრცის შექმნა მოქალაქეებისა და სამოქალაქო საზოგადოებისთვის, მათ მიერ არჩეულ მოხელეებთან, მედიასთან თუ პოლიტიკური პარტიების წევრებთან დიალოგისთვის.
