აჭარაში საჯარო დაწესებულებებში თანამშრომელთა ყოველთვიური ხელფასი დაგვიანებით გაიცა, რაც რეგიონის ფინანსთა და ეკონომიკის მინისტრის თქმით, სახაზინო საქმიანობის ახალ, ელექტრონულ სისტემაზე გადასვლას უკავშირდება. დავით ბალაძე განმარტავს, რომ ახალ სისტემაზე გადასვლისას იყო მცირე ხარვეზები.
"მიმდინარე თვეში მთელი ქვეყნის საბიუჯეტო და სახაზინო საქმიანობა ქაღალდის ბრუნვის აქამდე არსებული სისტემიდან, უფრო ეფექტურ ელექტრონულ სისტემაზე გადავიდა. შესაბამისად საბიუჯეტო ორგანიზაციებმა საბიუჯეტო ფინანსური სახსრების ანგარიშსწორება უკვე ელექტრონული ფორმატით დაიწყეს.
მინდა გითხრათ ,რომ აღნიშნული სისტემა საჯარო დაწესებულებების ერთ-ერთი ინოვაციური პროდუქტია. მისი მიზანი საბიუჯეტო ორგანიზაციების საფინანსო საქმიანობის პროცესის მაქსიმალური გამარტივება და ხელმისაწვდომობაა.
ახალ სისტემაზე გადასვლისას გვქონდა მცირე ხარვეზები, რომლის გამოც საჯარო დაწესებულებებში თანამშრომელთა ყოველთვიური გასამრჯელოები დაგვიანებით გაიცა, თუმცა თვის ბოლომდე ახალი ელექტრონული სისტემა აბსოლიტურად გამართულად იმუშავებს",- აღნიშნა დავით ბალაძემ.
მინისტრის განმარტებით, ახალი რეგულაციის მიხედვით პრემიებს ვეღარ აიღებენ მინისტრები, მათი მოადგილეები და უფლებამოსილებით დანიშნული პირები.
"ზეგანაკვეთზე შრომის ანაზღაურება დანამატით დარეგულირდა, რომელიც პასუხიმგებლობის ხარისხის მიხედვით გადანაწილდა. პრემია გაიცემა მხოლოდ მთავარ სპეციალისტებზე,განყოფილებისა და დეპარტამენტის უფროსებზე, მაგრამ ეს იქნება დიფერენცირებული, სამართლიანი, დამსახურების მიხედვით" - განაცხადა აჭარის ფინანსთა და ეკონომიკის მინისტრმა დავით ბალაძემ.
