27 იანვარს ხელი მოეწერა ხელშეკრულებას სს პროკრედიტ ბანკსა და სს თიბისი ბანკს შორის, რომლის საფუძველზე სს პროკრედიტ ბანკის 10 000 ევრომდე მიკრო სესხების საკრედიტო პორტფელი გასხვისდა.
სს პროკრედიტ ბანკის ახალი სტრატეგია 10 000 ევრომდე მიკრო სესხების ბაზრიდან გამოსვლასა და შესაბამისი მიკრო პორტფელის გაყიდვას ითვალისწინებს. აღნიშნული სესხები პროკრედიტ ბანკის მთელი სასესხო პორტფელის მხოლოდ 5%-ს შეადგენს. პროკრედიტ ბანკი დიდი პასუხისმგებლობით მოეკიდა მიკრო პორტფელის გასხვისებას და საბოლოო არჩევანი თიბისი ბანკზე გააკეთა.
სს პროკრედიტ ბანკის კლიენტები, რომლებიც მიკრო სესხებით სარგებლობდნენ, 15 თებერვლიდან სესხის დაფარვას თიბისი ბანკში გააგრძელებენ. აღნიშნული კლიენტებისთვის ინფორმაციის მიწოდება პროკრედიტ ბანკის მიერ საფოსტო გზავნილებითა და სატელეფონო ზარებით განხორციელდება. აგრეთვე სატელეფონო მომსახურების ცენტრში კლიენტებს საშუალება ექნებათ 24/7 მიიღონ მათთვის საჭირო ინფორმაცია.
პროკრედიტ ბანკსა და თიბისი ბანკს შორის გაფორმებული ხელშეკრულება არ ითვალისწინებს გასასახვისებელი კლიენტების მიმდინარე სასესხო პირობების შეცვლას. შესაბამისად კლიენტები იმავე პირობებით გააგრძელებენ მიმდინარე სესხების დაფარვას.
პროკრედიტ ბანკი მადლობას უხდის მიკრო ბიზნეს კლიენტებს ნდობისა და თანამშრომლობისთვის და მზად არის მთელი ძალისხმევა მიმართოს თავის ძირითად სამიზნე ჯგუფზე, მცირე და საშუალო ბიზნეს კლიენტებზე.
