საპარტნიორო ფონდი ექსპორტის წახალისების მიმართულებით კიდევ უფრო გააქტიურდება. როგორც ეკონომიკისა და მდგრადი განვითარების მინისტრმა გიორგი კვირიკაშვილმა განაცხადა, დაახლოებით 2 თვეში, საპარტნიორო ფონდის ბაზაზე ექსპორტის წახალისებისათვის სპეციალური მიმართულება შეიქმნება.
„ექსპორტის ხელშეწყობის კუთხით, საპარტნიორო ფონდის ფარგლებში, სპეციალური მიმართულება შეიქმნება, რომელიც დაკავებული იქნება ექსპორტიორი კომპანიების წახალისებით და მათი სხვადასხვა ფინანსური ინსტრუმენტებით დახმარებით. ეს იქნება, ის საერთაშორისო პრაქტიკა, რომელიც ბევრ ქვეყანაშია, რომლის ეკონომიკაც ექსპორტზე ორიენტირებულია",- განაცხადა გიორგი კვირიკაშვილმა.
შეგახსენებთ, რომ ექსპორტის კუთხით მთავრობის გააქტიურებაზე 27 იანვარს პრემიერ-მინისტრის, მთავრობის წევრებისა და სებ-ის პრეზიდენტის შეხვედრის შემდეგ გახდა ცნობილი, რომელიც თავის მხრივ ლარის კურსთან დაკავშირებით, გაიმართა.
შეხვედრაზე, გაანალიზდა საგარეო ფაქტორების გავლენა საქართველოში მიმდინარე ეკონომიკურ პროცესებზე.
მთავრობის ეკონომიკური გუნდის წარმომადგენლებმა და ეროვნული ბანკის პრეზიდენტმა იმსჯელეს იმ ღონისძიებებზე, რომლებიც ლარის გრძელვადიანი სტაბილურობის შენარჩუნების მიზნით უნდა განხორციელდეს.
მთავრობა ექსპორტის, ტურიზმისა და პირდაპირი უცხოური ინვესტიციების წახალისების მიზნით აქტიურად იმუშავებს.
როგორც შეხვედრაზე აღინიშნა, ქვეყანაში მოქმედებს მცურავი გაცვლითი კურსი და სიტუაცია კონტროლს ექვემდებარება.