აჭარაში ეკონომიკური ობსერვატორიის შექმნის საკითხი გადამწყვეტ ფაზაში გადადის. აჭარის ფინანსთა და ეკონომიკის სამინისტრომ ეკონომიკური ობსერვატორიის სამუშაო ჯგუფის შესაქმნელად კონკურსი უკვე გამოაცხადა. კონკურსის მიხედვით, საუბარია 3 ვაკანტურ პოზიციაზე (2 შტატგარეშე, ეკონომიკური ექსპერტი და 1 შტატგარეშე, ექსპერტთა ჯგუფის ხელმძღვანელი).
სამინისტროს ინფორმაციით, აჭარის რეგიონში „ეკონომიკური ობსერვატორიის სამუშაო ჯგუფის შექმნა" აჭარის ავტონომიური რესპუბლიკის 2015 წლის რესპუბლიკური ბიუჯეტით გათვალისწინებული ქვეპროგრამის ფარგლებში ხორციელდება.
ეკონომიკური ობსერვატორიის მთავარი მიზანი კი ეკონომიკური კვლევებისა და ანალიზის წარმოება, რეგიონის სოციალურ-ეკონომიკური განვითარების პროცესების მონიტორინგი და შესაბამისი რეკომენდაციების შემუშავების საფუძველზე, რეგიონის მთავრობისთვის ეფექტური ექსპერტულ-ანალიტიკური დახმარების გაწევაა.
"ობსერვატორიის საქმიანობა მნიშვნელოვანი სოციალურ-ეკონომიკური მონაცემების აგრეგაციას და რეგიონის შესახებ არსებული სოციალურ-ეკონომიკური ხასიათის ინფორმაციის დეფიციტის შემცირებას შეუწყობს ხელს",- განმარტავენ აჭარის ფინანსთა და ეკონომიკის სამინისტროში.
უწყებაში განმარტავენ, რომ აჭარის ეკონომიკური ობსერვატორის ვებ-გვერდის საშუალებით სხვადასხვა წყაროებიდან ანალიტიკური ინფორმაციის უფრო სწრაფი მიღება იქნება შესაძლებელი. დაინტერესებული პირები ასევე აჭარის რეგიონის ეკონომიკისა და შრომის ბაზრის საკითხებთან დაკავშირებით, კვლევებისა და ანალიზის საფუძველზე დამუშავებულ და დახარისხებულ ინფორმაციას გაეცნობიან.
