Batumi Tower-ში სასტუმრო განთავსდება, აღნიშნულის შესახებ განცხადება ეკონომიკისა და მდგრადი განვითარების მინისტრის პირველმა მოადგილემ დიმიტრი ქუმსიშვილმა გააკეთა. როგორც მინისტრის მოადგილე განმარტავს, ამ დროისათუს შენობაზე სამხარაულის სახელობის ექსპერტიზის ბიურო მუშაობს, რათა შენობის მდგომარეობის შესახებ დასკვნა დაიდოს.
„2012 წელს, ხელისუფლებაში მოსვლის შემდეგ ჩვენ სამართავად Batumi Tower-ის შენობაც გადმოგვეცა. იმ დროს შენობა კატასტროფულ მდგომარეობაში იყო. მასში პრაქტიკულად ყველა გადახურვიდან წყალი ჟონავდა. წყალი ასევე დგებოდა სარდაფშიც. მიუხედავად იმისა, რომ ჩვენს მიერ განხორციელებული სამუშაოების შედეგად, შენობაში წყალი აღარ ჩადის, მასში კვლავ რჩება კონსტრუქციული და სხვა სახის ხარვეზები", - განაცხადა დიმიტრი ქუმსიშვილმა და დასძინა, რომ „დღეის მდგომარეობით, შენობა შენარჩუნებულია. რაც შეეხება ინფორმაციას მის შემდგომ მდგრადობაზე, ამას ლევან სამხარაულის ექსპერტიზის ბიურო დაადგენს".
„ჩვენი ხელისუფლებაში მოსვლის შემდეგ გავისტუმრეთ Batumi Tower-ის ქვეკონტრაქტორების დავალიანება. მათ შორის, დასრულდა არა მხოლოდ შენობის ძირითადი ნაწილის, ისე მისი ძვირადღირებული ელემენტების (ეკრანი, ეშმაკის ბორბალი, აფრა) დაფინანსება. მეტიც, სწორედ ჩვენს დროს ჩაირთო ე.წ. ეშმაკის ბორბალი", - აღნიშნა დიმიტრი ქუმსიშვილმა.
როგორც ეკონომიკისა და მდგრადი განვითარების მინისტრის პირველმა მოადგილემ განაცხადა, ტექნოლოგიურ უნივერსიტეტთან დაკავშირებით მილენიუმის ფონდმა ჯერ კიდევ 2011 წელს გამოაგზავნა წერილი, სადაც დააფიქსირა, რომ მისი უარყოფითი პოზიცია ბათუმის კონცეფციასთან დაკავშირებით. „ამ გარემოებიდან გამომდინარე, ჩვენ უნდა მიგვეღო გადაწყვეტილება ბათუმში მდებარე შენობის მომავალზე", - აღნიშნა დიმიტრი ქუმსიშვილმა.
როგორც ეკონომიკისა და მდგრადი განვითარების მინისტრის პირველმა მოადგილემ დიმიტრი ქუმსიშვილმა განაცხადა, ბათუმის ტექნოლოგიური უნივერსიტეტის პროფილი მომავალში უკვე ცნობილია და შენობაში სასტუმრო განთავსდება.
როგორც ცნობილია, Batumi Tower -ში 110 ნომერზე გათვლილი სასტუმრო უნდა განთავსდეს, რისთვისაც შენობას მალე აუქციონზე გაიტანენ. როგორც ცნობილია, შპს „ბათუმი თაუერის" საკუთრებაში არსებულ უძრავ ქონებასთან დაკავშირებით, რამდენიმე ინვესტორთან განზრახულობათა ოქმი უკვე გაფორმებულია.
„შპს „ბათუმი თაუერის" საკუთრებაში არსებულ უძრავ ქონებასთან დაკავშირებით, ამ წუთში რამდენიმე ინვესტორთან გაფორმებულია განზრახულობათა ოქმი, რომ ობიექტი მომზადდება აუქციონზე გამოსატანად. შესაბამისად პირობები საკმაოდ ნორმალურია. ინვესტორები გვთავაზობენ, როგორც საპრივატიზაციო საფასურს, ასევე ინვესტიციების განხორციელებას, იმ შემთხვევაში თუ წარმატებით დასრულდა ყველა ეს მოლაპარაკება ჩვენ სავარაუდოდ 1,5-2 წელიწადში 110 ნომრიან ახალ სასტუმროს მივიღებთ, რომელიც ბათუმის და ზოგადადა ქვეყნის ტურისტულ ინფრასტრუქტურას შეემატება"- განუცხადა "ჯი-ეიჩ-ენს" ცოტახნის უკან დიმიტრი ქუმსიშვილმა.
მისივე განმარტებით, ვინაიდან Batumi Tower-ით დაინტერესებული ინვესტორები არიან მსხვილი საინვესტიციო კომპანიები, მათთვის უფრო კომფორტულია, როდესაც ქონებაზე თავიანთი მოთხოვნა აქვთ დაფიქსირებული და სახელმწიფო მზადაა, რომ ეს ქონება აუქციონზე გაიტანოს.
„ამ ეტაპზე ისინი სწვენ ხარჯებს, სწავლობენ შენობას და მის არქიტექტურას და პროექტის გადაკეთების შესაძლებლობას. ისინი, რომ დარწმუნებულნი იყვნენ, რომ ამის შემდეგ სახელმწიფო ქონებას აუქციონზე გამოიტანს, სწორედ ამიტომ დგება განზრახულობათა ოქმი", - აცხადებს ქუმსიშვილი.
ცოტა ხნის უკან Batumi Tower-ით, დაინტერესებული იყო "მარიოტიც", რომელსაც შენობაში MOXY-ის ბრენდის სასტუმროს განთავსება სურდა, თუმცა საბოლოოდ ინვესტორს საქმე ბოლომდე აღარ მიუყვანია.
შეგახსენებთ, რომ 2013 წლის შემაჯამებელ პრესკონფერენციაზე ეკონომიკისა და მდგრადი განვითარების მინისტრმა გიორგი კვირიკაშვილმა განმარტა, რომ „ბათუმი თაუერში" 4 ვარსკვლავიანი სასტუმრო განთავსდებოდა. თავის დროზე რომ „ბათუმი თაუერში" ტექნოლოგიური უნივერისიტეტის განთავსება იგეგმებოდა, თუმცა ხელისუფლების ცვლილების შემდეგ პროექტი აღარ განხორციელდა.
