პრემიერმა ირაკლი ღარიბაშვილმა ლიკანში „რიქსოს" სასტუმრო კომპლექსი გახსნა. როგორც პრემიერმა სიტყვით გამოსვლისას განცხადა აღნიშნული სასტუმრო მნიშვნელოვანია არა მხოლოდ ლიკანისთვის, არამედ მთლიანად ბორჯომის რაიონისთვის.
ღარიბაშვილის განმარტებით, „რიქსოს" სასტუმრო კომპლექსი ქართულ-ყაზახური ერთობლივი ინვესტიციით აშენდა.
,,ეს სასტუმრო არის ძალიან მნიშვნელოვანია, რადგან ლიკანში და ზოგადად ბორჯომის რაიონში გაიხსნა კიდევ ერთი ხუთვარსკვლავიანი სასტუმრო. როგორც უკვე აღვნიშნე ეს არის ერთობლივი ქართულ-ყაზახური ინვესტიციები პროექტი. პროექტი საპარტნიორო ფონდმა ყაზახურ კომპანიასთან ერთად განახორციელა. ჩვენ ყოველთვის მივესალმებით ყაზახური კომპანიების საქართველოში შემოსვლას, მათი ინვესტიციები არის ჩვენთვის მნიშვნელოვანი", -განაცხადა პრემიერმა.
მისივე განმარტებით, ლიკანში ახალი სასტუმროს შექმნა ხელს შეუწყობს ახალი სამუშაო ადგილების გაჩენას. როგორც ღარიბაშვილმა განაცხადა სასტუმროში ამ დროისთვის 200 ადამიანია დასაქმებული
შეგახსენებთ, რომ სასტუმროს 9 სართულზე 151 ნომერია განთავსებული.
კომპლექსი დასვენებისთვის აუცილებელი თანამედროვე ინფრასტრუქტურით არის აღჭურვილი და საკონფერენციო დარბაზებს, ჩოგბურთისა და ფეხბურთის სათამაშო მოედნებს, საცურაო აუზს და სატრენაჟორო დარბაზს მოიცავს.
კომპლექსი საპარტნიორო ფონდის და ყაზახური კომპანია "ყაზმუნაიგაზის" ერთობლივი ინვესტიციით აშენდა და მისი ჯამური ღირებულება 48 მილიონ აშშ დოლარს შეადგენს. საპარტნიორო ფონდის მონაწილეობა პროექტში კაპიტალის 50%-ია.
საპარტნიორო ფონდის ახალ მენეჯმენტს პროექტი შეჩერებული დახვდა. ახალმა მენეჯმენტმა პროექტის დასასრულებლად დაიწყო მოლაპარაკებები, რის შედეგადაც უზრუნველყოფილ იქნა მშენებლობის შეუფერხებელი პროცესი.
მშენებლობის დროს ობიექტზე 600-მდე ადგილობრივი მუშაობდა. ამჟამად, „რიქსოს ბორჯომმა" მუდმივ შტატში 200 ადამიანი აიყვანა და დასაქმებულთა რიცხვის გაზრდას გეგმავს.
სასტუმრო კომპლექსის გახსნის ცერემონიას საქართველოს პრემიერ-მინისტრი ირაკლი ღარიბაშვილი, ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, საპარტნიორო ფონდის აღმასრულებელი დირექტორი ირაკლი კოვზანაძე, ნავთობკომპანია "ყაზტრანს ოილ"-ის დირექტორი კაბილდინ კაიერგელდი და ყაზახეთის რესპუბლიკის ელჩი საქართველოში ერმუჰამეტ ერტისბაევი დაესწრნენ.
