საქართველოს საივესტიციო პოტენციალი და ახალი ინვესტიციების განხორციელების შესაძლებლობები განიხილეს დღეს საქართველოს პრემიერ-მინისტრ ირაკლი ღარიბაშვილის ესტონელ ბიზნესმენებთან გამართულ შეხვედრაზე. მთავრობის მეთაურმა სტუმრებს საქართველოს საინვესტიციო გარემო გააცნო.
მთავრობის ადმინისტრაციის ინფორმაციით,შეხვედრას კომპანია Skinest Rail -ის დამფუძნებელი ოლეგ ოსინოვსკი, პარტნიორებთან ერთად დაესწრო.
ესტონელი ბიზნესმენები, რომლებიც ქართულ-ესტონურ ბიზნესფორუმზე დასაწრებად ჩამოვიდნენ, საქართველოში ინვესტიციების განხორციელებით არიან დაინტერესებულნი.
პრემიერ-მინისტრის განცხადებით, საქართველოს მეგობარი, უმსხვილესი ინვესტორის- ოლეგ ოსინოვსკის მაგალითი კარგად გვიჩვენებს, რომ ქვეყანას ყველაზე კარგი რეკლამა შეუძლია გაუწიოს ინვესტორმა, რომელიც თავს დაცულად და კომფორტულად გრძნობს და თავის პარტინიორებსაც ეპატიჟება.
