როგორც გამოცემა წერს, არსებობს გარკვეული მიმართულებები, სადაც ერთი დღით მოგზაურობაზე ყველა ადამიანი ოცნებობს. ესენია: პარიზი, რომი, ბანგკოკი, რიო დე ჟანეირო, იერუსალიმი, ტოკიო, ნიუ-იორკი, ბუენოს აირესი, სტოკჰოლმი და სხვა.

გამოცემის ინფორმაციით, გარდა ამისა, კულტურითა და ისტორიებით ჯადოსნური ქალაქები არსებობს, რომლებიც გლობალურ სამყაროში სხვადასხვა დინამიური ფორმით ხასიათდებიან, თუმცა, უნდა აღინიშნოს ისიც, რომ ყველა იმ ქვეყნის დათვალიერება შეუძლებელია, სადაც ტურიზმი სრულად არის განვითარებული.

„მსოფლიოში სხვადასხვა ადგილები ტურისტებისთვის ცხელ წერტილებად იქცევა - ასე რომ, უფრო მეტი მიზეზი არსებობს იმისთვის, რათა მსგავსი ქვეყნები ადრე თუ გვიან მოინახულოთ. არ არსებობს უკეთესი დრო და ადგილი მათ დასათვალიერებლად, ვიდრე ოცი წლის ასაკში იმყოფებით", - წერს Elite Daily.

გამოცემა აღნიშნავს, რომ ასაკის მატებასთან ერთად, მოგზაურობის კომფორტი და მარტივად მართვადი ტურების მოთხოვნა იზრდება, მაგრამ სამყაროში არსებობს ადგილები, რომლებიც ტურისტებმა იმ დროს უნდა დაათვალიერონ, სანამ ამის ენერგია აქვთ. გამოცემა იმ 50 ადგილსა და ქვეყანას ასახელებს, რომლებსაც მოქალაქეები კონკრეტული მიზნით, ახალგაზრდობაში უნდა ეწვიონ.

აღნიშნულ სიაში პირველ ადგილზე შოტლანდიაა, რომელსაც ნიუ ორლეანი, იაპონია, კერძოდ კუნძული ოკინავა; ირლანდია, კანადა, სომხეთი - ერევანი, შრი-ლანკა და ნორვეგია მოყვება. პირველ ათეულში მეცხრე ადგილს საქართველო, კონკრეტულად კი, მესტია იკავებს, რომელსაც მეათე ადგილით, ისლანდია მოსდევს.

გამოცემა წერს, რომ მესტია საქართველოს ჩრდილოეთ ნაწილში მდებარეობს, მაგრამ ნამდვილად ღირს, რომ ახალგაზრდები აღნიშნულ ადგილს ეწვიონ, სადაც ისინი ქართულ ღვინოს დააგემოვნებენ, მყინვარს დალაშქრავენ, ადგილობრივ მოსახლეობას შეხვდებიან და კავკასიის მთებში ეპიკურ სილამაზეს განიცდიან.

საქართველოს შემდეგ აღნიშნულ ნუსხაში ლიბანის დედაქალაქი ბეირუთი მოდის, რომელსაც ჩრდილოეთ კორეა, თურქეთი, ნეპალი, დენმარკი, რუსეთი, იტალია, საფრანგეთი, მექსიკა, პაკისტანი, კოლუმბია და სხვა ქვეყნები მოყვება.

იმ ქვეყნებს შორის, რომლებსაც სასურველია მოქალაქეებმა ახალგაზრდობაში ეწვიონ, ბოლო ადგილს პერუ, ავსტრალია, არგენტინა, ინდოეთი და მიანმარი იკავებს.