ნოემბერში მეწარმეობის განვითარების სააგენტოსა და საქართველოს ბაზარზე მოქმედ სამივე სალიზინგო კომპანიას შორის: სს „თიბისი ლიზინგი", შპს „საქართველოს სალიზინგო კომპანია" და სს „ალიანს ჯგუფი ლიზინგი" გაფორმდა თანამშრომლობის შესახებ შეთანხმება, რომლის თანახმადაც სალიზინგო კომპანიების მხრიდან დაწესებულია მაქსიმუმ 15% წლიური საპროცენტო განაკვეთი, საიდანაც 12%-ს პირველი 2 წლის განმავლობაში მეწარმეობის განვითარების სააგენტო დაფარავს. ერთი თვის შემდეგ 2014 წლის ბოლოდან აქტიურად ამოქმედდა მეწარმეობის განვითარების სააგენტოს მიერ ფინანსური ხელმისაწვდომობის უზრუნველყოფის მეორე ინსტრუმენტი- სალიზინგო მომსახურების საპროცენტო განაკვეთის თანადაფინანსება.
სალიზინგო მომსახურებით სარგებლობა შეუძლიათ როგორც ახალ ბიზნესებს, ასევე არსებულ საწარმოებს გაფართოება/გადაიარაღების მიზნით, მაგრამ ლიზინგის ფინანსური ინსტრუმენტი არ არის ხელმისაწვდომი იმ მეწარმე სუბიექტებისათვის, რომლებიც უკვე სარგებლობენ პროგრამის ფინანსებზე ხელმისაწვდომობის კომპონენტის კრედიტის მიმართულებით.
2014 წლის დეკემბრის ბოლოს გაფორმებული ხელშეკრულებების თანახმად მეწარმეობის განვითარების სააგენტოს მიერ ლიზინგის მიმართულებით ფინანსური ხელმისაწვდომობის უზრუნველყოფის შედეგად მოხდება ორი საწარმოს გადაიარაღება და ერთი ახალი საწარმოს ჩამოყალიბება. კომპანიების საქმიანობის პროფილს წარმოადგენს პლასტმასის ნაწარმის წარმოება (ცელოფნის პარკი, შესაფუთი მასალები, პლასტმასის სათლები).
შპს „პოლიედრო" მოახდენს არსებული საწარმოს გადაიარაღებას, რისთვისაც განახორციელებს 181 950 აშშ დოლარის მოცულობის ინვესტიციას. კომპანიის მიერ მიღებული სალიზინგო მომსახურების ღირებულება შეადგენს 173 475 აშშ დოლარს, დარიცხული საპროცენტო განაკვეთი-15%, საიდანაც პირველი 2 წლის განმავლობაში მეწარმეობის განვითარების სააგენტო დააფინანსებს 12%-ს. ანალოგიურად შპს „მეგაპლასტი"-ს სალიზინგო მომსახურების თანხა შეადგენს 101 000 აშშ დოლარს, 15%-იანი საპროცენტო განაკვეთით და მეწარმეობის განვითარების სააგენტო, პირველი 2 წლის განმავლობაში დაფარავს 12%-ს.
შპს „გვგ პლასტი" შექმნის ახალ საწარმოს. ჯამური ინვესტიციის მოცულობა შეადგენს 527 604 აშშ დოლარს. კომპანიის მიერ მიღებული სალიზინგო მომსახურების ღირებულება შეადგენს 274 724 აშშ დოლარს 14%-იანი განაკვეთით, საიდანაც პირველი 2 წელი კომპანიას მხოლოდ 2%-ის გადახდა მოუწევს რადგან 12% მეწარმეობის განვითარების სააგენტო აანაზღაურებს.
სამი ახალი პროექტის ხელშეწყობის შედეგად განხორციელდება 810 543 აშშ დოლარის ინვესტიცია და ზემოხსენებულ კომპანიებს მიეცემათ სწრაფი განვითარების საშუალება. შეიქმნება დაახლოებით 60 სამუშაო ადგილი.
სახელმწიფო პროგრამის „აწარმოე საქართველოში" ფინანსებზე ხელმისაწვდომობის კომპონენტს 2014 წლის ნოემბერში დაემატა ლიზინგის მიმართულება, რომელიც არის დამატებითი ფინანსური ინსტრუმენტი იმ მცირე და საშუალო ბიზნესის განვითარების ხელშეწყობისათვის, რომელთაც სურთ ძირითადი საშუალების შეძენა. ლიზინგის მიმართულება ხელმისაწვდომს ხდის ძირითად აქტივებს მათთვისაც, ვისაც ბანკისთვის ქონებრივი ან ფინანსური უზრუნველყოფის წარდგენის კუთხით აქვთ სიძნელეები.
პროგრამის ინდუსტრიული ნაწილის ფარგლებში სსიპ მეწარმეობის განვითარების სააგენტო მოახდენს ლიზინგის საგანზე დარიცხული წლიური საპროცენტო განაკვეთის თანადაფინანსებას 24 თვის განმავლობაში. პროგრამის ფარგლებში გაცემულ სალიზინგო პროექტებზე სალიზინგო კომპანიების მხრიდან დაწესებულია მაქსიმუმ 15% წლიური საპროცენტო განაკვეთი, საიდანაც 12%-ს დაფარავს სააგენტო. ამასთან, ვინაიდან პროგრამა გათვლილია მცირე და საშუალო საწარმოების განვითარებაზე, სალიზინგო პროექტის საწყისი ღირებულება განისაზღვრება 50,000 აშშ დოლარით, ხოლო მაქსიმალური 2,000,000 აშშ-დოლარის ოდენობით.
თუ ბენეფიციარი წარმოადგენს ახალ საწარმოს, იგი ვალდებულია წარმოების დაწყება განახორციელოს ლიზინგის საგნის გაცემიდან 24 თვის განმავლობაში, ხოლო არსებული ბიზნესის გაფართოების შემთხვევაში, დაიწყოს წარმოება ლიზინგის საგნის გაცემიდან 12 თვის განმავლობაში. ასევე, წარმოების დაწყებიდან ორი წლის განმავლობაში წარმოების პროფილი უნდა იქნეს შენარჩუნებული.
„აწარმოე საქართველოში" პროგრამის ამოქმედებიდან, ფინანსური მხარდაჭერის-კრედიტისა და სალიზინგო მომსახურებების თანადაფინანსება, უძრავი ქონებით უზრუნველყოფისა და სოფლის მეურნეობის კომპონენტში უკვე დამტკიცებულია 57 პროექტი და არსებული საწარმოები საერთო ჯამში დაახლოებით 123 107 543 აშშ დოლარის ინვესტიციას განახორციელებენ
