ისრაელში დაკავებულ ქართველებს საქართველოს კონსული ირაკლი ადვაძე მონახულებს.
ამის შესახებ საგარეო საქმეთა მინისტრის მოადგილემ ნინო კალანდაძემ დღეს გამართულ პრესკონფერენციაზე განაცხადა.
"სამწუხაროდ ხშირად ჰგონიათ, რომ ისრაელში სამუშაოს პოვნა ადვილია, თუმცა ეს ასე არ არის, რადგან დასაქმებასთან დაკავშირებით ისრაელს საკმაოდ მკაცრი კანონმდებლობა აქვს. მიუხედავად ამისა ჩვენი მოქალაქეების არალეგალურად მაინც ცდილობენ ისრაელში გადასვლას, მათ შორის ეგვიპტის გავლით. რაც შეეხება დაკავებულ 45 ქართველს მათ ისრაელში ჩვენი კონსული ირაკლი ადვაძე მოინახულებს", - განაცხადა კალანდაძემ.
მისივე თქმით, იმ შემთხვევაში თუ გაირკვა, რომ საქართველოს მოქალაქეების მოთხოვნა ლტოლვილის სტატუსის შესახებ ლეგალური არ არის ასეთ შემთხვევაში მათ დეპორტაცია ემუქრებათ.
ამასთან, საგარეო უწყებამ საქართველოს მოქალაქეებს კიდევ ერთხელ მოუწოდებს სხვა ქვეყნის ტერიტორიაზე არალეგალურად შესვლაზე თავი შეიკავონ.
შეგახსენებთ, რომ ისრაელში გამგზავრებული აღდგომის ბრწყინვალე დღესასწაულზე მომლოცველებიდან საქართველოს 45 მოქალაქე ისრაელში დარჩა და ლტოლვილის სტატუსი ითხოვა. ისრაელის საემიგრაცო სამსახური ქართველების საქმის განხილვას დღეს დაიწყებს.
