აჭარის ბიუჯეტი 12 %-იანი გადაჭარბებით შესრულდა. როგორც აჭარის ფინანსთა და ეკონომიკის სამინისტროში განმარტავენ, აჭარის ავტონომიური რესპუბლიკის 2014 წლის ნაერთი ბიუჯეტის გეგმა 188 მლნ 549,1 ათასი ლარი იყო, თუმც 2014 წლის 31 დეკემბრის მდგომარეობით შესრულებამ 210 მლნ 393,4 ათასი ლარი შეადგინა, რაც იმას ნიშნავს, რომ გეგმა 111,6 %-ით შესრულდა.
რაც შეეხება 2014 წლის რესპუბლიკურ ბიუჯეტს ის 112 %-ითაა შესრულებული. სამინისტროს ინფორმაციით, აჭარის რესპუბლიკური ბიუჯეტის გეგმა 143 მლნ 198,2 ათასი ლარი იყო, თუმცა წლის ბოლოს შესრულებამ 160 მლნ 367,8 ათასი ლარი შეადგინა.
ნაერთი ბიუჯეტის მუხლობრივი განხილვის მიხედვით კი ირკვევა, რომ გადასახადების მუხლი შესრულებულია 111,1 %-ით, სხვა შემოსავლების მუხლი კი 113,8%-ით. ხოლო რაც შეეხება არაფინანსური აქტივების მუხლს - ის 2014 წლის მდგომარეობით 109,3%-ითაა შესრულებული.
მუნიციპალური ერთეულების მიხედვით კი, 2014 წელს ყველაზე მაღალი მოცულობით შესრულება ქობულეთის მუნიციპალიტეტში ფიქსირდება, სადაც გეგმა 63,6 %-იანი გადაჭარბებითაა შესრულებული. 2014 წლის მდგომარეობით ხულოს ბიუჯეტი 50,5 %-იანი გადაჭარბებითაა შესრულებული, ხოლო ხელვაჩაურის ბიუჯეტი კი- 12,6 %-იანი გადაჭარბებით. რაც შეეხება შუახევს, მისი ბიუჯეტი 116,7 %-ითაა შესრულებული, ბათუმის კი - 106,5%-ით, ხოლო ქედას მუნიციპალურო ბიუჯეტი 2014 წლის მდგომარეობით 104,3 %-ით შესრულდა.
