ორი ქვეყნის საავიაციო ხელისუფლებებს შორის გაფორმებული შეთანხმება ითვალისწინებს ორი ქვეყნის საავიაციო ხელისუფლებებს შორის სამოქალაქო ავიაციის უსაფრთხოების სფეროში თანამშრომლობის გაღრმავებას, ევროპის საავიაციო უსაფრთხოების სააგენტოსა (EASA) და სამოქალაქო ავიაციის საერთაშორისო ორგანიზაციის (ICAO) მოქმედი სტანდარტებისა და რეკომენდირებული პრაქტიკის დანერგვის პროცესში ტექნიკური დახმარების, გამოცდილების გაზიარებისა და კონსულტაციების გაწევის კუთხით. შეთანხმება აგრეთვე ითვალისწინებს, ფრენის უსაფრთხოების სტანდარტების ამაღლების მიზნით, ევროპელი ფრენის უსაფრთხოების ინსპექტორების აქტიურ ჩართვას სააგენტოს მიერ დაგეგმილ ავიაკომპანიების ინსპექტირების პროცესში, ასევე, ექსპერტებისა და სპეციალისტების ურთიერთგაცვლას.
ტექნიკური თანამშრომლობის ფარგლებში, ავსტროკონტროლის ექსპერტები სააგენტოს ფრენის უსაფრთხოების ინსპექტორებთან ერთად უკვე ჩართულნი არიან საქართველოში რეგისტრირებული ავიაკომპანიების რესერტიფი-ცირების პროცესში.
„Austro Control International" წარმოადგენს ავსტრიის საავიაციო ხელისუფლების - „Austro Control"-ის 100%-იან წილობრივ საკუთრებაში მყოფ შვილობილ კომპანიას, რომელიც ეწევა პროფესიულ სასწავლო, საკონსულტაციო და საპროექტო მომსახურებას ევროპის საავიაციო კანონმდებლობის შემუშავებისა და დანერგვის ეტაპებზე. „Austro Control" კი თავის მხრივ არის ევროპაში აღიარებული, წამყვანი საავიაციო ხელისუფლება, რომელიც სასერტიფიკაციო და საზედამხედველო საქმიანობასთან ერთად, აქტიურად არის ჩართული ევროპის საავიაციო უსაფრთხოების სააგენტოს (EASA) კანონშემოქმედებით პროცესში და ამ მხრივ ევროკავშირის საავიაციო ხელისუფლებების ტოპ ხუთეულში იმყოფება.