- „Premium Compliance Advisory"-იმ („PCA"), საქართველოს ბანკის ჰოლდინგის (Bank of Georgia Holdings plc) შვილობილმა კომპანიამ, აზერბაიჯანის დედაქალაქში, ბაქოში, ფულის გათეთრების წინააღმდეგ და ტერორიზმის დაფინანსებასთან ბრძოლის (AML/CFT) თაობაზე მრგვალი მაგიდა გამართა, რომელსაც ფულის გათეთრების წინააღმდეგ ბრძოლისა და შესაბამისობის უზრუნველყოფის მიმართულებით მომუშავე პროფესიონალები, წამყვანი აზერბაიჯანული და საერთაშორისო ბანკების წარმომადგენლები დაესწრნენ. მრგვალ მაგიდაზე განიხილეს ხსენებულ სფეროში რეგულაციების განვითარების მსოფლიო ტენდენციები და ამ თვალსაზრისით ფინანსური ინსტიტუტების წინაშე არსებული გამოწვევები.
„საერთაშორისო ბიზნეს ტრანზაქციის განხორციელებისას, მოლაპარაკების პირველივე ეტაპი გულისხმობს ფულის გათეთრების წინააღმდეგ ბრძოლისა და შესაბამისობის სტანდარტების გადამოწმებას. ჩვენი სურვილია კოლეგებს გავაცნოთ „PCA"-ს გუნდის წევრების მდიდარი გამოცდილება და მიდგომა AML/CFT-ის სფეროში არსებულ გამოწვევებთან დაკავშირებით. ასევე, გვსურს მოვისმინოთ და გავიზიაროთ მათი შეხედულება" განაცხადა „PCA"-ს მთავარმა მმართველმა დირექტორმა, ლევან ყულიჯანიშვილმა.
„PCA" საკონსულტაციო კომპანიაა, რომელიც იურიდიულ პირებს სთავაზობს მომსახურებას AML/CFT შესაბამისობის, საინფორმაციო უსაფრთხოების, თაღლითობის მენეჯმენტისა და შიდა აუდიტის მიმართულებით. „PCA" დაკომპლექტებულია მაღალი დონის ექსპერტებით შესაბამისობის სფეროდან, რომელთაც გააჩნიათ საქართველოს ბანკის ჯგუფში მუშაობის მნიშვნელოვანი გამოცდილება.