უკანასკნელ დღეებში რუსეთიდან მარცვლეულის ექსპორტი სერიოზულად შეფერხდა. ექსპერტების ინფორმაციით, ამის მიზეზი გახდა ის, რომ რუსეთის შესაბამისი სტრუქტურები სერთიფიკატებს გასცემენ მხოლოდ ხორბლის ექსპორტზე თურქეთის, ეგვიპტის, სომხეთსა და ინდოეთის მიმართულებით.
რუსეთის სოფლის მეურნეობის პროდუქტების ექსპორტიორთა ეროვნულმა ასოციაციამ უკვე გაუგზავნა წერილი ქვეყნის ვიცე-პრემიერს არკადი დვორკოვიჩს, რომლითაც მთავრობას სთხოვს რომ მარცვლეულის ექსპორტის შეზღუდვასთან დაკავშირებული საკითხები "ცივილურად და გამჭვირვალედ" გადაწყვიტოს. ასოციაცია ითხოვს, რომ საშუალება მიეცეთ უკვე არსებულ კონტრაქტებით ნაკისრი ვალდებულებები შეასრულონ, რომლებიც ზოგიერთ შემთხვევაში აპრილის ბოლომდეა უკვე დაკონტრაქტებული.
რუსული მედია უკვე წერს, რომ ხორბლის ექსპორტის შეზღუდვამ გარკვეული გავლენა იქონია ევროპულ ბაზარზეც. ტრეიდერები ამბობენ, პირველი მსხვერპლი უკვე არსებობს. მედიაში უკვე ღიად დაიწერა, რომ ექსპორტიორები ვერ იღებენ ფიტოსანიტარულ სერთიფიკატებს საქართველოსა და იემენისთვის გადასაზიდად გამზადებული ხორბლისთვის.
საქართველოს ხორბლისა და პურ - პროდუქტების მწარმოებელთა ასოციაციის ხელმძღვანელი ლევან სილაგავა აცხადებს, რომ მიუხედავად არსებული შეზღუდვებისა ქართულ ბაზარზე ხორბლის მიწოდების მხრივ პრობლემა არ არსებობს, რადგანაც ქვეყანაში ხორბლის საკმარისი მარაგები არსებობს.
"რუსეთის მეხორბლეთა ასოციაცია და ექსპორტიორთა კავშირი მთავრობაში მიმართვებს აგზავნიან, რომ არ შეიძლება ასეთი არაცივილიზებული მეთოდებით ბაზრის დაკეტვა და ის კონტრაქტები, რომელიც არსებობდა შესასრულებელია. ამ ფონზე, იმედი გაჩნდა, რომ ის კონტრაქტები, რომელიც არსებობდა შესრულდება"-, განმარტავს ხორბლისა და პურ - პროდუქტების მწარმოებელთა ასოციაციის ხელმძღვანელი ლევან სილაგავა. სილაგავა განმარტავს, რომ წლის ამ პერიოდში რუსეთიდან ხორბლის შემოტანა ისედაც არ ხდებოდა, თუმცა ეს დეკემბრის ბოლოდან იწყებოდა და ამ ხნის განმავლობაში მეხორბლეები უფრო მეტი მარაგების დაგროვებას ახერხებდნენ.
"წლის ბოლოს ისედაც არის პაუზა, რუსეთი 25 დეკემბრიდან 20 იანვრამდე ფაქტობრივად ისვენებს და აქტიობა არის ნაკლები. პორტებიც შეზღუდულად მუშაობს. საწარმოებიც ფაქტობრივად დაკეტილია. ამიტომ ყველა ცდილობს, რომ ამ ერთი თვის მარაგი წინასწარ შეიძინოს. 25 დეკემბრამდე კიდე გვქონდა ვადა, რომ მეტი მარაგი დაგვეგროვებინა"- აცხადებს სილაგავა. ხორბლისა და პურ - პროდუქტების მწარმოებელთა ასოციაციის ხელმძღვანელის განმარტებით, ამ დროისათვის საქართველო ხორბალს მხოლოდ რუსეთიდან იღებდა, თუმცა ეს მოხდა იმიტომ, რომ რუსული ხორბლის ფასი იყო ხელსაყრელი, თუმცა თუ რუსეთის მხრივ პრობლემები სამომავლოდაც გაგრძელდება, მაშინ ქვეყანა ყაზახური და უკრაინული ხორბლის შემოტანას დაიწყებს.
"რუსული ხორბლის ფასი და შემდგომ მისი ტრანსპორტირების ღირებულება იყო ისეთი, რომ რუსეთიდან ხორბლის იმპორტი გვაწყობდა. რუბლის ვარდნა მიდიოდა და ხორბალი საკმაოდ სწრაფი ტემპით გადიოდა ქვეყნიდან. ალბათ, სწორედ ამიტომაც ჩაკეთეს ბაზარი, რომ ქვეყნიდან ხორბალი სწრაფად გადიოდა.
პრობლემა არ არის, ხორბალს ყაზახეთიდან და უკრაინიდან შემოვიტანთ, თუმც ფასი სხვა იქნება. ფასი გაიზრდება, თუმცა ეს პურის ფასზე ასახვას არ პოვებს. ეს იმიტომ, რომ ქვეყანაში ხორბლის მარაგი გვაქვს და არსებული მარაგებით 2 თვის განმავლობაში ქვეყანაში ხორბლის ფასის მომატება არ მოხდება. ამ პერიოდში, თუ კი მეხორბლეები ცდილობენ, რომ მოიმარაგონ ხორბალი, ისე ცდილობენ პურის საწარმოებიც, რომ 1-2 თვის მარაგი გააკეთონ"- განმარტავს სილაგავა.
მისივე ინფორმაციით, პურის ფასის მომატებაზე საუბარი დაიწყება მას შემდეგ, რაც 1 ტომარა ფქვილის ფასი 45 ლარს გადააჭარბებს, დღეისათვის კი 1 ტომარა ფქვილი 35 ლარი ღირს.
"სპეკულირება, რომ დაიწყოს იმაზე და პურის საწარმომ თქვას ფქვილის გაძვირდა და მეც პურს ვაძვირებო - ეს იქნება არასწორი. ზოგადად ფქვილის გაძვირებიდან 1,5 თვის შემდგომ ხდება მისი ასახვა პურის ფასსზე. დღესდღეობით კი ფქვილის ფასი 35-36 ლარია. ეს ის ფასია, რომელიც მეწარმეებისათვის ძალიან კომფორტულია. ზოგადად მეპურეების მხრიდან 45 ლარიდან იწყება უკვე საუბარი, რომ პურის გაძვირებაზე შეიძლება დაიწყოს ფიქრი. დარწმუნებული ვარ, რომ 45 ლარამდე ფქვილის ფასი არ მივა",- აცხადებს სილაგავა.
