"ყველა ქვეყანა ცდილობს, რომ საკუთარი ქვეყნის ავიაკომპანიებს შეუწყოს ხელი და არ შეზღუდონ, ჩვენთან რატომღაც პირიქით ხდება", - აღნიშნულის შესახებ განცხადებას, საქართველოს ტურ-ოპერატორთა ასოციაციის თავმჯდომარე ია თაბაგარი, ავიაკომპანია Georgian Airways-ს მიერ საქართველოს ეროვნული ავიაციის მიმართ წაყენებული ბრალდებების შეფასებისა აკეთებს.
ია თაბაგარი განმარტავს, რომ რუსეთის ავიაგადამზიდავებისათვის შეუზღუდავი უფლებების მინიჭება, მაშინ როდესაც კნინდება ეროვნული ავიახაზები, არ შეიძლება.
"Georgian Airways-ი ("აირზენა") არის ეროვნული ავიაკომპანია და გარკვეულწილად მართლები არიან. ერთადერთი ხარისხი არ აქვთ ძალიან მაღალი, მაგრამ ამ შემთხვევაში არიან სრულიად მართლები. რუსეთი მთლიანობაში არის ძალიან არასტაბილური ქვეყანა და შესაბამისად მათი ავიახაზებიც. ამიტომ შეუზღუდავი უფლებების მინიჭება მათთვის, როცა დაკნინდება ეროვნული ავიახაზები სწორად ნამდვილად არ მიმაჩნია.
ყველა ქვეყანა ცდილობს, რომ საკუთარი ქვეყნის ავიაკომპანიებს შეუწყოს ხელი და არ შეზღუდონ, ჩვენთან რატომღაც პირიქით ხდება.
არ ვიცი ამ ყველაფრის უკან რა დგას, მაგრამ ეს ყველაფერი ტურიზმისთვისაც ძალიან ცუდია. გარდა იმისა, რომ თავად ავიაკომპანია დაზარალდება შორს მიმავალ გეგმებში, იმიტომ რომ ეს ასე არ დარჩება. შესაძლოა უახლოს დროში რაღაც მოლაპარაკება მოხდეს და დროებით გააგრძელონ მუშაობა, მაგრამ შორს მიმავალ გეგმებში, როდესაც ქართულ ბაზარზე გაძლიერდება რუსეთის ავიახაზები, მე მგონი ეს კარგს არაფერს არ მოუტანს არც ქვეყნის იმიჯს, არც ავიაკომპანიას და არც თავისთავად ტურიზმს",- განმარტავს ია თაბაგარი და დასძენს, რომ კარგია როდესაც ბაზარზე ახალი მოთამაშე შემოდის, მაგრამ უნდა იყოს ჯანსაღო კონკურენციაც.
"ახლა რუსეთის ავიახაზებისთვის ასეთი უფლებების მინიჭება ცუდი იქნება იმ მხრივ, რომ ექსკლუზივს ჩაიგდებენ ხელში და სამომავლოდ სხვა ავიაკომპანიებიც შესაძლოა გავიდნენ ქართული ბაზრიდან",- აღნიშნა
საქართველოს ტურ-ოპერატორთა ასოციაციის თავმჯდომარემ.
შეგახსენებთ, რომ დღეს კომპანია "Georgian Airways"-მა ბრიფინგი გამართა და სამოქალაქო ავიაციის სააგენტოს უფროსის გურამ ჯალაღონიას თანამდებობიდან გადაყენება მოითხოვა.
"ჩვენი მოთხოვნებია: გაუქმდეს რუსეთის ფედერაციაში გაგზავნილი 8 ივლისის ნოტა, რომლითაც რუსეთის ავიაკომპანიებს მიენიჭათ შეუზღუდავი უფლება თბილისი-მოსკოვი-თბილისი მიმართულებით ფრენებზე. ასევე დაუყოვნებლივ გაუქმდეს საქართველოს საავიაციო ხელისუფლების მიერ რუსულ ავიაკომპანიებზე გაცემული ფრენის ნებართვები, რუსეთის ფედერაციასთან საჰაერო მიმოსვლა აღდგეს იმ პირობით, რაც იყო ფრენების შეწყვეტამდე, ანუ 2006 წლის ნოემბრამდე", აცხადებენ "Georgian Airways"-ის თანამშრომლები.