ლარმა დაიწყო გამყარება, აღნიშნულის შესახებ განცხადება ქვეყნის პრემიერ-მინისტრმა მთავრობის ადმინისტრაციაში გამართულ ბრიფინგზე გააკეთა. ღარიბაშვილმა ის ფაქტორებიც დაასახელა, რამაც ლარის კურსის დაცემაზე და დოლარის გამყარებაზე გავლენა მოახდინა.
"ლარის კურსთან დაკავშირებით მოვლენები განვითარდა ისე, როგორც ვაცხადებდით ჩვენ. ლარმა დაიწყო გამყარება. დღეს უკვე ლარის ოფიციალური გაცვლითი კურსი დოლართან მიმართებაში არის 1,92 ლარი, ხოლო ბაზარზე არის 1,88 ლარი. ლარის კურსზე ძირითად ზეგავლენას ძირითადი ზეგავლენა მოახდინა შემდეგმა ფაქტორებმა: დოლარი გამყარდა თითქმის ყველა ვალუტის მიმართ, მათ შორის ევროს მიმართ. ასევე უნდა აღინიშნოს რეგიონში არსებული ეკონომიკურ-პოლიტიკური ვითარება, რამაც მნიშვნელოვანი გავლენა მოახდინა ჩვენს სავაჭრო ბალანსზე. ეს იყო ის ძირითადი საგარეო ფაქტორები, რამაც იმოქმედა ლარის კურსზე",- აღნიშნა ირაკლი ღარიბაშვილმა.
პრემიერ-მინისტრმა ხელოვნურ აჟიოტაჟში ოპონენტებიც დაადანაშაულა.
"ჩვენი ოპონენტები და ზოგიერთი ექსპერტი, ამბობდნენ, რომ თითქოს ლარის გაუფასურება საგარეო ინვესტიციების შემცირებამ გამოიწვია. დღეს პირდაპირ უცხოურ ინვესტიციებთან გამოქვეყნებული მონაცემები ცხადყოფს, რომ ეს იყო მიზანმიმართული ტყუილი"- განაცხადა ირაკლი ღარიბაშვილმა.