,,საერთაშორისო გამჭვირვალობა-საქართველო"-ს ინფორმაციით, ადგილობრივ თვითმმართველობებში საჯარო მოსამსახურეთა რაოდენობის ზრდა საშუალოდ 17 მილიონი ლარით გაზრდის საბიუჯეტო ხარჯებს. ორგანიზაციის მიერ გავრცელებული გაქნცხადების თანახმად, „ადგილობრივი თვითმმართველობის კოდექსში" 28 ნოემბერს შესული ცვლილებებით, შეიცვალა ფორმულა, რომელიც თვითმმართველ საჯარო უწყებებში ასაყვან თანამშრომელთა მაქსიმალურ რაოდენობას ადგენდა. ძველი ფორმულით, ადგილობრივ თვითმმართველობებში 10 157 საშტატო ერთეული იყო განსაზღვრული, ახლით კი - 12 573.
ცვლილებების შედეგადად, მთელი ქვეყნის მასშტაბით ადგილობრივი თვითმმართველობის ერთეულების საჯარო მოხელეთა მაქსიმალური საშტატო რაოდენობა 2 416-ით (24%) გაიზარდა.
ამის გათვალისწინებით, უცნაურია, რომ კანონპროექტის ინიციატორი და ავტორი ფრაქცია „ქართული ოცნების" წევრი გია ჟორჟოლიანი განმარტებით ბარათში ცვლილების მიღების მიზეზად მიუთითებს შემდეგს: „შენარჩუნდეს მუნიციპალიტეტების მოსამსახურეთა არსებული შტატების რაოდენობა თითქმის ყველა მუნიციპალიტეტში, თუმცა შეიზღუდოს მისი გაზრდის შესაძლებლობა".
,,საერთაშორისო გამჭვირვალობა-საქართველო"-ს მიერ გაკეთებული გამოთვლებით, მხოლოდ ქუთაისსა და ხელვაჩაურის მუნიციპალიტეტში შემცირდა ეს ზღვარი, ყველა დანარჩენ შემთხვევაში კი ზღვარი იზრდება (დიაგრამა 2). გარდა ამისა, ორგანიზაციის ცნობით, კანონპროქტის ფინანსურ დასაბუთებაში აღნიშნულია, რომ ცვლილებები არ იწვევს ბიუჯეტიდან დამატებით ხარჯებს.
,,საერთაშორისო გამჭვირვალობა-საქართველო"-ს იმისათვის, რომ გაერკვია, დაახლოებით რა დამატებითი ხარჯები შეიძლება გამოიწვიოს ამ ცვლილებამ, საჯარო სექტორში დასაქმებული პირის საშუალო ხელფასის შესახებ საქართველოს სტატისტიკის ეროვნული სამსახურის 2013 წლის მონაცემი (738.7 ლარი) და გავამრავლეთ 2 416 თანამშრომელზე.
ორგანიზაციის გამოთვლით, ეს ცვლილება სახელმწიფოსთვის ყოველწლიურად, მხოლოდ ხელფასის სახით, 17 მილიონი ლარით მეტ დანახარჯს გამოიწვევს.
