საპარტნიორო ფონდის ხელმძღვანელმა პირებმა საფრანგეთის განვითარების სააგენტოს (AFD) დელეგაციას უმასპინძლა. შეხვედრაზე დელეგაციის წევრებმა საპარტნიორო ფონდთან თანამშრომლობის მიმართ ინტერესი და საქართველოსთან ეკონომიკური ურთიერთობის ხელშეწყობის და კავშირების გაღრმავების სურვილი გამოთქვეს.
ფრანგული დელეგაცია გაეცნო ფონდის საქმიანობის შესახებ ინფორმაციას და ფონდის მიერ დასაფინანსებელი პროექტების შერჩევის მეთოდებსა და კრიტერიუმებს.
1941 წელს დაფუძნებული საფრანგეთის განვითარების სააგენტო წარმოადგენს საფრანგეთის რესპუბლიკის საჯარო ინსტიტუტს, რომელიც განვითარებადი ქვეყნებისთვის უზრუნველყოფს სახელმწიფო დახმარებას. სააგენტო თავის საქმიანობას 80 ქვეყანაში ახორციელებს. იგი მოქმედებს მასპინძელი სახელმწიფოს პრიორიტეტული საინვესტიციო პროგრამის ფარგლებში, სახელმწიფოსთვის, ადგილობრივი გაერთიანებებისთვისა და საჯარო ან კერძო საწარმოებისთვის ან ფინანსური ინსტიტუტებისთვის გრძელვადიანი სესხების, გრანტების და გარანტიების გაცემის ფორმით.
შეგახსენებთ, რომ სააქციო საზოგადოება საპარტნიორო ფონდი საქართველოს მთავრობის მიერ 2011 წელს დაარსდა. სახელმწიფო ფლობს ფონდის 100 პროცენტს. საპარტნიორო ფონდის აქტივები 5 მილიარდ ლარს აჭარბებს. ფონდი ფლობს „საქართველოს რკინიგზის", „საქართველოს ნავთობისა და გაზის კორპორაციის", „საქართველოს სახელმწიფო ელექტროსისტემის", ელექტროსისტემების კომერციული ოპერატორისა" და ნაწილობრივ, „თელასის" აქციებს. ფონდის ერთ-ერთი მთავარი ამოცანაა საინვესტიციო მიმართულებებთან ერთად, ამ სახელმწიფო სტრატეგიული აქციების სწორი კორპორატიული მართვა.
