საქართველოს პრეზიდენტის მრჩეველმა ეკონომიკის საკითხებში გიორგი აბაშიშვილმა დღეს პრესკონფერენცია გამართა და საზოგადოებას ეროვნული ბანკის საბჭოს წევრობის კანდიდატი გააცნო.
„24 ნოემბერს ეკონომიკის ექსპერტებმა, ეკონომიკის სფეროში მომუშავე არასამთავრობო ორგანიზაციებმა საქართველოს პრეზიდენტს წარუდგინეს 5 კანდიდატი, რომელთაგან საქართველოს პრეზიდენტმა გადაწყვიტა, რომ საქართველოს პარლამენტს წარუდგინოს ერთ-ერთი მათგანის - ნიკოლოზ ყაველაშვილის კანდიდატურა", - განაცხადა გიორგი აბაშიშვილმა და დასძინა, რომ საქართველოს პრეზიდენტის გადაწყვეტილებით, ყველა სამუშაო პროცესი, მათ შორის ეროვნული ბანკის საბჭოს წევრობის შემდგომი კანდიდატურების დასახელება, რაც 2016 წელს მოხდება, სწორედ სამოქალაქო საზოგადოების საკმაოდ აქტიური ჩართულობით წარიმართება.
როგორც გიორგი აბაშიშვილმა აღნიშნა, პროცესი მაქსიმალურად გამჭვირვალედ წარიმართა და მასში აქტიურად იყვნენ ჩართული სამოქალაქო სექტორის წარმომადგენლები, ეკონომიკის სფეროში მომუშავე არასამთავრობო ორგანიზაციები და ეკონომიკის ექსპერტები. სახელმწიფოს მეთაურის სახელით, მან მადლობა გადაუხადა ექსპერტებს ნაყოფიერი მუშაობისთვის.
ნიკოლოზ ყაველაშვილი ილიას სახელმწიფო უნივერსიტეტის ასოცირებული პროფესორი და ადმინისტრაციის ხელმძღვანელის მოადგილეა. იგი იყო ფონდის „ათასწლეულის გამოწვევა" საქართველოს რეგიონალური განვითარების ფონდის პროექტის დირექტორი და Overseas Private Investment Corporation მიერ მხარდაჭერილი საინვესტიციო ფონდის - Bedminster Capital Management წარმომადგენელი საქართველოში. ნიკოლოზ ყაველაშვილი ასევე მუშაობდა ამერიკული ნავთობკომპანია „კონოკოს" ფინანსურ და ადმინისტრაციულ მენეჯერად და ფონდი ღია საზოგადოება საქართველოს აღმასრულებელ დირექტორად, ასევე - საერთაშორისო სავალუტო ფონდის, გაეროს განვითარების პროგრამის წარომადგენლობებში საქართველოში და მსოფლიო ბანკის კონსულტანტად.
ივ. ჯავახიშვილის სახელობის თბილისის სახელმწიფო უნივერსიტეტის დამთავრების შემდეგ ეკონომიკისა და ფინანსების მაგისტრის ხარისხი ბინგემტონში, ნიუ იორკის სახელმწიფო უნივერსიტეტში მიიღო. აქვს ბიზნესადმინისტრირების დოქტორის აკადემიური ხარისხი.
