24 ნოემბერს ტელეკომუნიკაციების საერთაშორისო კავშირის (ITU), საქართველოს მთავრობისა და კომუნიკაციების ეროვნული კომისიის ინიციატივით, თბილისში, სასტუმრო „რადისონ ბლუ ივერიაში" ყოველწლიური მსოფლიო სატელეკომუნიკაციო/ICT ინდიკატორების მე-12 სიმპოზიუმი (WTIS-2014), გაიმართა, რომელიც ოფიციალურად გახსნა საქართველოს პრემიერ-მინისტრმა ირაკლი ღარიბაშვილმა. სიმპოზიუმის გახსნის ცერემონიალში ასევე მონაწილეობდნენ ვიცე-პრემიერი, საქართველოს ეკონომიკისა და მდგრადი განვითარების მინისტრი გიორგი კვირიკაშვილი, ტელეკომუნიკაციების საერთაშორისო კავშირის (ITU) გენერალური მდივანი ჰუოლინ ჟაო, ტელეკომუნიკაციების საერთაშორისო კავშირის განვითარების ბიუროს დირექტორი ბრაჰიმა სანოუ და საქართველოს კომუნიკაციების ეროვნული კომისიის თავმჯდომარე ვახტანგ აბაშიძე.
მსოფლიო სატელეკომუნიკაციო/ICT ინდიკატორების სიმპოზიუმი წარმოადგენს მთავარ გლობალურ ფორუმს ტელეკომუნიკაციების/ICT სტატისტიკის, ინფორმაციის შეგროვების და ანალიზის საკითხებში. მის მუშაობაში მონაწილეობის იღებენ სპეციალიზირებული დარგობრივი საერთაშორისო ორგანიზაციების, ITU-ს წევრი სახელმწიფოების კავშირგაბმულობის ადმინისტრაციების და მარეგულირებელი ორგანიზაციების, ეროვნული სტატისტიკური ორგანიზაციების, ტელეკომუნიკაციების საოპერატორო კომპანიების წარმომადგენლები და ექსპერტები.
„დღეს გაიხსნება საინფორმაციო პაკეტები და გამოცხადდება წინა წლის მონაცემების მიხედვით შედგენილი ახალი რეიტინგები, თუმცა, ტელეკომუნიკაციების საერთაშორისო კავშირის გენერალურმა მდივანმა წინასწარ დაანონსა, რომ ამ საერთაშორისო რეიტინგებში ტელეკომუნიკაციების სფეროს განვითარების მიხედვით საქართველოს პოზიცია რამდენიმე საფეხურით გაუმჯობესდა. მნიშვნელოვანია, რომ მსოფლიოს 94 ქვეყნის მაღალი რანგის წარმომადგენლები ესწრებიან წლევანდელ სიმპოზიუმს, რომლებიც გაეცნობიან საქართველოში მიმდინარე რეფორმებს.
ეს არის საქართველოსთვის ერთ-ერთი უმნიშვნელოვანესი პრიორიტეტი, ვინაიდან საინფორმაციო და სატელეკომუნიკაციო სისტემები დიდ როლს თამაშობენ სხვა სფეროების განვითარებაში.ჩვენ გვაქვს ძალიან მნიშვნელოვანი პროგრამა საქართველოს მასშტაბით ინტერნეტის ხელმისაწვდომობის კუთხით. საქართველოს ნებისმიერ ნებისმიერ წერტილში შედარებით შეღავათიანი ფასით მიიღოს მოსახლეობას ექნება ინტერნეტთან წვდომა და საინფორმაციო უზრუნველყოფა მაღალ დონეზე" - განაცხადა გიორგი კვირიკაშვილმა.
ვიცე-პრემიერმა ჟურნალისტებთან ინოვაციებისა და ახალი ტექნოლოგიების ხელშეწყობის პროგრამებზეც ისაუბრა. მისი თქმით, სამინისტროს ინოვაციებისა და ტექნოლოგიების სააგენტოს ფუნქციონირების ფარგლებში დაგეგმილია სამი ტექნოლოგიური პარკის გახსნა საქართველოში. „აქედან ერთი იქნება ახალი ტექნოლოგიებისა და ინოვაციების დამოუკიდებელი ცენტრი, ხოლო ორი პარკი შეიქმნება არსებული საგანმანათლებლო ინსტიტუტების ბაზაზე. ეს ცენტრები სპეციალური პროგრამებით მოემსახურება ახალგაზრდა, ნიჭიერ ადამიანებს, რომლებსაც გააჩნიათ ინოვაციური იდეები და გამოგონებები და მოხდება ამ იდეების კომერციალიზაცია. სახელმწიფო სპეციალური პროგრამებით, მათ შორის გრანტებით და შეღავათიანი სესხებით ხელს შეუწყობს ამ მიმართულების განვითარებას" - აღნიშნა ეკონომიკისა და მდგრადი განვითარების მინისტრმა.
