ახალი ამბების სააგენტო „ჯი-ეიჩ-ენი" აქვეყნებს „აფხაზეთის რესპუბლიკასა და რუსეთის ფედერაციას შორის მოკავშირეობისა და სტრატეგიული პარტნიორობის შესახებ" პროექტის არაოფიციალურ თარგმანს.

ხელშეკრულების პროექტით ცხადი ხდება, რუსეთის ფედერაციის მიერ აფხაზეთის ანექსიისა და შემდგომში საკუთარი იურისქციის ქვეშ მოქცევის აშკარა მცდელობა.

იმის გათვალისწინებით, რომ დოკუმენტის პროექტი ამ დრომდე ქართულ ენაზე არ გამოქვეყნებულა, მიზანშეწონილად მიგვაჩნია მისი გაცნობა ფართო საზოგადოებითვის.

აფხაზეთის რესპუბლიკასა და რუსეთის ფედერაციას შორის მოკავშირეობისა და სტრატეგიული პარტნიორობის შესახებ
აფხაზეთის რესპუბლიკა და რუსეთის ფედერაცია, შემდგომში მხარეები, ხელმძღვანელობენ რა 2008 წლის 17 სექტემბრის მოსკოვის შეთანხმებით მეგობრობის, თანამშრომლობისა და ურთიერთდახმარების შესახებ, ტრადიციული მეგობრული ურთიერთობისა და კეთილმეზობლობის, მჭიდრო ისტორიული კავშირების, ურთიერთპატივისცემისა და ნდობის, ასევე, რეგიონალური და გლობალური საფრთხეების გათვალისწინებით, დარწმუნებულნი არიან იმაში, რომ მეგობრული ურთიერთობების გაღრმავება, მრავალპოლარული ურთიერთთანამშრომლობა და სტრატეგიული პარტნიორობა ორივე ქვეყნის ეროვნულ ინტერესებში შედის და კავკასიის რეგიონში მშვიდობის, უსაფრთხოებისა და სტაბილურობის დამყარებას ემსახურება. ამავე დროს, ხელშეკრულების მონაწილე მხარეები ადასტურებენ გაეროს წესდების პრინციპებისა და საერთაშორისო ნორმების ერთგულებას, მათ შორის, ადამიანის უფლებებისა და თავისუფლების პატივისცემას და გამოთქვამენ სხვა სახელმწიფოებთან კეთილმეზობლური ურთიერთობის სურვილს. აფხაზეთი და რუსეთი სახელმწიფოთშორისი ურთიერთობის ახალ ეტაპზე გადადიან, რაც მიზნად აფხაზეთისა და რუსეთის სუვერენიტეტის გამყარებასა და ტერიტორიული მთლიანობის უზრუნველყოფას ისახავს. აქედან გამომდინარე, ხელშეკრულების მონაწილე მხარეები თანხმდებიან შემდეგზე:

მუხლი 1

მხარეები აგრძელებენ ორმხრივ, თანასწორ და კონსტრუქციულ თანამშრომლობას რეგიონალური უსაფრთხოების, მოკავშირეობისა და სტრატეგიული პარტნიორობის საკითხებში, რაც დამყარებული იქნება ორივე ქვეყნის სუვერენიტეტისა და ტერიტორიული მთლიანობის ურთიერთპატივისცემის პრინციპზე.

მუხლი 2

1.შეთანხმების რეალიზაციის კონკრეტული ეტაპები, დღის წესრიგი და დაფინანსების წყაროები, ღონისძიებები და პირობების შესრულება განისაზღვრება:
_ცალკე ხელშეკრულებებით, რომელსაც მხარეები დებენ შეთანხმების მე-3 მუხლით გათვალისწინებული პირობებით მოკავშირეობის განვითარებისა და სტრატეგიული პარტნიორობის შესახებ.
_ცალკე პროტოკოლებით, რომლებიც წინამდებარე შეთანხმების განუყრელ ნაწილს შეადგენს.
_პასუხისმგებელი ორგანოების ერთობლივი გადაწყვეტილებით.
2. წინამდებარე ხელშეკრულების რეალიზაციას მხარეები მისი ძალაში შექმნიდან ერთი თვის ვადაში განსაზღვრავენ.

მუხლი 3

მოკავშირეობის გაღრმავებისა და სტრატეგიული პარტნიორობის ძირითადი მიმართულებებია:
-ერთიანი კოორდინირებული საგარეო პოლიტიკის გატარება;
_თავდაცვისა და უსაფრთხოების საერთო სივრცის შექმნა;
_საერთო ეკონომიკური და სოციალური სივრცის შექმნა;
_აფხაზეთის რესპუბლიკის სოციალურ-ეკონომიკური განვითარების ხელშეწყობა;
_პოსტსაბჭოთა სივრცეში სრულფასოვანი ინტეგრაციისთვის აფხაზეთისთვის შესაბამისი პირობების შექმნა, რაც რუსეთის ინიციატივით ან ხელშეწყობით გახდება შესაძლებელი;
_საერთო კულტურული, სულიერი და ჰუმანიტარული სივრცის შენარჩუნება

მუხლი 4

1.მხარეები ატარებენ კოორდინირებულ საგარეო პოლიტიკას, რომელიც სხვადასხვა სფეროში თანამშრომლობისას ორივე მხარის ინტერესების გათვალისწინებასა და ერთმანეთის ინფორმირებას ითვალისწინებს. მხარეები მჭიდროდ თანამშრომლობენ კავკასიის რეგიონში მშვიდობის, უსაფრთხოებისა და სტაბულურობის დამყარების საკითხებში.
2.რუსეთის ფედერაცია დაეხმარება აფხაზეთს საერთაშორისო კავშირების გამყარებაში, იზრუნებს აღიარების პოლიტიკის გაგრძელებასა და საერთაშორისო ორგანიზაციებში აფხაზეთის ინტეგრაციაზე, მათ შორის, რუსეთის ინიციატივით ან ხელშეწყობით დაარსებულ ორგანიზაციებშიც.

მუხლი 5

თავდაცვისა და უსაფრთხოების ერთიანი სივრცის ფორმირება ითვალისწინებს:
_უსაფრთხოების საკითხებზე კონსულტაციებს და ერთობლივი პოზიციის ჩამოყალიბებას;
_გაერთიანებული სამხედრო დაჯგუფების შექმნას, შესაძლო აგრესიის ან თავდასხმის მოსაგერიებლად (რაც შესაბამისობაში მოდის გაეროს წესდების 51 მუხლთან) და გაერთიანებული სამხედრო დაჯგუფების მმართველი ორგანოს ფორმირებას;
_ერთობლივი ღონისძიებების გატარებას აფხაზეთი-საქართველოს სახელმწიფო საზღვრისა და საზღვაო სივრცის დასაცავად, რომელზედაც აფხაზეთის სუვერენული უფლებები და იურისდიქცია ვრცელდება.
მუხლი 6
1. თუ ერთ-ერთი მხარეზე განხორციელდება სამხედრო აგრესია რომელიმე სახელმწიფოს ან სახელმწიფოების მხრიდან, ეს მეორე მხარის მიერაც აგრესიად იქნება აღქმული;
2. აგრესიის შემთხვევაში ერთი მხარე მეორეს უზრუნველყოფს სამხედრო დახმარებით, გაეროს წესდების 51-ე მუხლის გათვალკისწინებით;
3. ამ მუხლის გათვალისწინებით მიღებული ზომების შესახებ მხარეები დაუყოვნებლივ აცნობებენ გაერთიანებული ერების ორგანიზაციას. ამასთან, მხარეები ზემოთ აღნიშნული ზომების მიღებისას გაეროს წესდებით იხელმძღვანელებენ.

მუხლი 7

1.შესაძლო სამხედრო აგრესიის (შეიარაღებული თავდასხმის) თავიდან აცილების მიზნით, მხარეები ხელშეკრულების ძალაში შესვლიდან ერთი წლის განმავლობაში ქმნიან ერთობლივ სამხედრო დაჯგუფებას, რომელიც ფორმირებული იქნება აფხაზეთისა და რუსეთის შეიარაღებული ძალებისგან.
2.აგრესიის გარდაუვალი საფრთხის ან საომარ პირობებში დაჯგუფების მეთაურად ინიშნება რუსეთის, მის მოადგილედ კი- აფხაზეთის წარმომადგენელი. აფხაზეთის ტერიტორიაზე გაერთიანებული სამხედრო დაჯგუფების მიერ ძალის გამოყენება შეთანხმებული უნდა იყოს აფხაზეთის შეიარაღებული ძალების მეთაურთან.
3. მშვიდობიან პერიოდში გაერთიანებული სამხედრო დაჯგუფების შენაერთებს შორის ურთიერთობას განსაზღვრავს ოპერატიული ჯგუფი, რომელიც როგორც აფხაზეთის, ისე რუსეთის წარმომადგენლებით იქნება დაკომპლექტებული.
4. გაერთიანებული სამხედრო დაჯგუფების შემადგენლობა, მისი ფორმირება, ფუნქციონირება და უზრუნველყოფა განისაზღვრება ცალკეული ხელშეკრულებებით, რომელსაც მხარეები 6 თვის განმავლობაში დადებენ.

მუხლი 8

1.მხარეები 3 წლის განმავლობაში უზრუნველყოფენ აფხაზეთის შეიარაღებული ძალების მოდერნიზებას, ეტაპობრივ უნიფიკაციას, მატერიალურ-ტექნიკურ უზრუნველყოფას, დაფინანსებასა და სამხედრო მოსამსახურეებისთვის სოციალურ გარანტიებს. რუსეთის მხარე ასევე ვალდებულებას იღებს, აფხაზეთის შეიარაღებული ძალები თანამედროვე იარაღით აღჭურვოს.
2.ხელშეკრულებით გათვალისწინებული ღონისძიებებუის დაფინანსებას საკუთარ თავზე რუსეთი იღებს იმ ცალკეული ხელშეკრულებების საფუძველზე, რომლის დადების ვალდებულებასაც მხარეები ხელშეკრულების ძალაში შესვლიდან 6 თვის განმავლობაში იღებენ.

მუხლი 9

1.მხარეები აღიარებენ საკუთარ ვალდებულებებს რუსეთ-აფხაზეთის საზღვრის დაცვის შესახებ 2009 წლის 30 აპრილის შეთანხმების პირობების გათვალისწინებით.
2.მხარეები ასევე იღებენ ვალდებულებას, ხელშეკრულების ძალაში შესვლიდან არაუგვიანეს 2 წლისა მიიღონ კომპლექსური ზომები აფხაზეთისა და საქართველოს სახელმწიფო საზღვრის, ასევე, საზღვაო სივრცის დასაცავად. მხარეები ასევე უზრუნველყოფებ რუსეთ-აფხაზეთის საზრვარზე თავისუფალ გადაადგილებას, უსაფრთხოების მიზნით დაწესებული შეზღუდვების გათვალისწინებით.
3. მხარეებმა ხელშეკრულების ძალაში შესვლიდან 2 წლის განმავლობაში უნდა უზრუნველყონ აფხაზეთ-საქართველოს საზღვარის საინჟინრო-ტექნიკური აღჭურვა.
4. მე-9 მუხლის მე-2 და მე-3 ნაწილით გათვალისწინებულ კომპლექსურ ზომებსა და მათი რეალიზაციის გეგმას მხარეები 6 თვის განმავლობაში შეათანხმებენ.

მუხლი 10

1.ორგანიზებულ და სხვა სახის დანაშაულთან ბრძოლის კოორდინირების მიზნით მხარეები ერთი წლის განმავლობაში ერთობლივ საინფორმაციო-საკოორდინაციო ცენტრს შექმნიან.
2.ცენტრი შემდეგ ამოცანებს შეასრულებს:
_გაცვლის ოპერატიულ ინფორმაციას და შეადგენს აუცილებელ ოპერატიულ-კრიმინალურ ანგარიშებს;
_შექმნის ორგანიზებული დანაშაულის წევრთა საერთო ბაზას, რომელთა მოღვაწეობაც ხელს უშლის ორი ქვეყნის ინტერესებს;
_ შეკრებს და ანალიზს გაუკეთებს ორგანიზებული დანაშაულის შესახებ არსებულ მონაცემებს;
_უზრუნველყოფს საერთაშორისო ძებნილთა გამოვლენას, დაკავებასა და გადაცემას;
_მოახდენს განსაკუთრებულ საშიშ დანაშაულთან ბრძოლის კოორდინირებას;
_შეიმუშავებს და წარუდგენს მხარეებს თანამშრომლობის ეფექტურობის გაღრმავების გეგმას.
3. შინაგან საქმეთა ორგანოების ბაზაზე ერთობლივი საინფორმაციო-საკოორდინაციო ცენტრის შექმნის გეგმასა და მის ფუნქციებს ხელშეკრულების მონაწილე მხარეები განსაზღვრავენ ცალკეული შეთანხმებებით, რომლებიც დაიდება ხელშეკრულების ძალაში შესვლიდან არაუგვიანეს 6 თვისა.
4. მხარეები უზრუნველყოფენ აფხაზეთის შინაგან საქმეთა სამინისტროს მატერიალურ-ტექნიკურ აღჭურვას, დაფინანსებას და სამართალდამცავი ორგანოების თანამშრომლებისთვის სოციალურ გარანტიებს.
5. ხარჯების დაფარვას, ხელშეკრულების მეათე მუხლის მე-4 ნაწილის მიხედვით, უზრუნველყოფს რუსეთის ფედერაცია ცალკეული შეთანხმებებით, რომლებიც დაიდება ხელშეკრულების ძალაში შესვლიდან არაუგვიანეს 6 თვისა.

მუხლი 11

1.აფხაზეთის რესპუბლიკა წინამდებარე ხელშეკრულების ძალაში შესვლიდან 3 წლის განმავლობაში მოახდენს ღონისძიებების კომპლექსის რეალიზებას საბაჟო რეგულაციების საკითხში და უზრუნველყოფს აფხაზეთის საბაჟო კანონმდებლობის ჰარმონიაზციას ევრაზიის ეკონომიკური კავშირის საბჟო სისტემასთან. ასევე შემუშავებულ იქნება აფხაზეთისა და რუსეთის საბაჟო სტრუქტურების მოქმედების ერთიანი მიდგომა.
2.რუსეთის ფედერაცია აუცილებელ მეთოდოლოგიურ დახმარებას გაუწევს აფხაზეთის რესპუბლიკას მე-11 მუხლის პირველი ნაწილით გათვალისწინებული ღონისძიებების კომპლექსის შესრულებაში.
3. მე-11 მუხლის პირველ ნაწილში გათვალისწინებული ღონისძიებების კომპლექსის რეალიზების გეგმას მხარეები შეათანხმებენ წინამდებარე ხელშეკრულების მოქმედებაში შესვლიდან 6 თვის გვადაში.
4. აფხაზეთის რესპუბლიკა ხელშეკრულების ძალაში შესვლიდან 3 წლის ვადაში მოახდენს რუსეთის კანონმდებლობასთან საკუთარი საბიუჯეტო კანონმდებლობის შესაბამისობაში მოყვანას, რათა მოხდეს ერთობლივი ნორმატიული სამართლებრივი რეგულაცის დამყარება.
5. რუსეთის ფედერაცია აუცილებელ მეთოდოლოგიურ დახმარებას გაუწევს აფხაზეთს მე-11 მუხლის მე-4 ნაწილით გათვალისწინებული ღონისძიებების კომპლექსის რეალიზებაში.
6. მე-11 მუხლის მე-4 ნაწილით გათვალისწინებული ღონისძიებების კომპლექსის რეალიზების გეგმას მხარეები შეათანხმებენ ხელშეკრულების ძალაში შესვლიდან არაუგვიანეს 6 თვის ვადაში.

მუხლი 12

ერთი მხარის მიერ მეორე მხარის ტერიტორიაზე სპეციალიზებული ორგანოს შექმნა, რომლის ფუნქციაშიც შევა საბაჟო გაფორმება და კონტროლი, ასევე, საქონლისა და სატრანსპორტო საშუალებების გადაადგილების კონტროლი, 2010 წლის 16 ოქტომბრის შეთანხმების საფუძველზე ითვალისწინებს შემდეგ ღონისძიებებს:
_საბაჟო კონტროლის ზონების შექმნას;
_დროებითი შენახვის საწყობების შექმნას;
_საბაჟო იდენტიფიკაციის საშუალებების (პლომბები, შტამპების, ბეჭდების) გამოყენებას.
2.რუსეთისა და აფხაზეთის საბაჟო ორგანოები აღიარებენ საბაჟო კონტროლის შედეგებს.

მუხლი 13

რუსეთის ფედერაცია მიიღებს დამატებით ზომებს აფხაზეთის მცხოვრებლებისთვის რუსეთის მოქალაქეობის მინიჭების პროცედურების გასამარტივებლად.

მუხლი 14

1.აფხაზეთის რესპუბლიკა ეტაპობრივად უზრუნველყოფს სახელმწიფო სტრუქტურებში (ჯანდაცვა, განათლება, მეცნიერება, კულტურა, სპორტი, სოციალური მომსახურება) დასაქმებულთა ხელფასების გაზრდას და მის დაახლოვებას რუსეთის ფედერაქციის სამხრეთ ოლქის სტანდარტებთან.
2.ხელფასების მატება მოხდება რუსეთის ფედერაციის მიერ გამოყოფილი სახსრებით და მისი პირობები და ვადები ხელშეკრულების ძალაში შესვლიდან 3 წლის განმავლობაში განისაზღვრება.

მუხლი 15

1.რუსეთის ფედერაცია 2015 წლის 1 იანვრიდან 3 წლის განმავლობაში უზრუნველყოფს აფხაზეთში მცხოვრები რუსეთის მოქალაქეებისთვის პენსიის გაზრდას და რუსეთის სამხრეთ ოლქის სტანდარტებთან შესაბამისობაში მოყვანას.
2.პენსიის გაზრდის პირობებსა და ვადებს, ასევე, შესაბამისი სახსრების გამოყოფას მხარეები ცალკეული ხელშეკრულებებით არაუგვიანეს 3 თვის ვადაში შეწათანხმებენ.

მუხლი16

აფხაზეთის რესპუბლიკა შექმნის აუცილებელ პირობებს საკუთარ ტერიტორიაზე მცხოვრები რუსეთის მოქალაქეებისთვის სამედიცინო დაზღვევით უზრუნველყოფისთვის, რუსეთის ფედერაციაში არსებული საყოველთაო დაზღვევის სისტემის შესაბამისად. აფხაზეთის ტერიტორიაზე მცხოვრებ რუსეთის მოქალაქეებს საშუალება მიეცემათ სამედიცინო დახმარება რუსეთის ფედერაციაში არსებულ სამედიცინო დაწესებულებებში მიიღონ.
2.რუსეთის ფედერაცია აფხაზეთის ხელშეწყობით ხელშეკრულების ძალაში შესვლიდან არაუგვიანეს 1 წლის ვადაში გაატარებს ღონისძიებათა კომპლექსს, რომელიც უზრუნველყოფს:
_აფხაზეთის ტერიტორიაზე მცხოვრები რუსეთის მოქალაქეების დაზღვევას;
_აფხაზეთში ტერიტორიაზე მცხოვრები რუსეთის მოქალაქეებისთვის რუსეთის ტერიტორიაზე სამედიცინო დახმარების მიღების ორგანიზაციას.
3. მე-16 მუხლის 1-ლ და მე-2 ნაწილებით გათვალისწინებული ღონისძიებების რეალიზაციის გეგმას მხარეები დაამტკიცებენ ცალკეული შეთანხმებებით, რომლებიც დაიდება ხელშეკრულების ძალაში შესვლიდან არაუგვიანეს 6 თვის ვადაში.

მუხლი 17

აფხაზეთის ჯანდაცვის სისტემის განვითარებისთვის რუსული მხარის ხელშეწყობით აფხაზეთის რესპუბლიკა მიიღებს:
_ჯანდაცვის სფეროში ნორმატიულ-სამართლებრივ აქტებს, რომელიც შესაბამისობაში მოვა რუსეთის ჯანდაცვის კანონმდებლობით გათვალისწინებულ ნორმებთან. ნორმატიულ-სამართლებრივი აქტები მიღებულ იქნება არაუგვიანეს 3 წლის ვადაში. ნორმატიული აქტების შინაარსი და მოქმედების ვადები განისაზღვრება ცალკეული ხელშეკრულებებით, რომელსაც მხარეები ხელშეკრულების ძალაში შესვლიდან არაუგვიანეს 6 თვის ვადაში გააფორმებენ.
_აფხაზეთის ჯანდაცვის განვითარების პროგრამა შემუშავებულ იქნება ხელშეკრულების ძალაში შესვლიდან არაუგვიანეს 6 თვის ვადაში.

მუხლი 18

1.აფხაზეთის რესპუბლიკა რუსეთის ფედერაციის ხელშეწყობით ხელშეკრულების ძალაში შესვლიდან არაუგვიანეს 3 წლის ვადაში მოახდენს ღონისძიებების კომპლექსის რეალიზებას, რომელიც მიმართული იქნება იმ ფიზიკური პირებისა და ორგანიზაციებისკენ, რომლებიც სამედიცინო და ფარმაცევტულ საქმიანობას აპირებენ. აღნიშნულმა პირებმა და ორგანიზაციებმა რუსეთის ფედერაციაში არსებული ნორმატივების ანალოგიური ნორმები უნდა დააკმაყოფილონ.
2.ღონისძიებათა კომპლექსის რეალიზების გეგმა მხარეებმა ხელშეკრულების ძალაში შესვლიდან 6 თვის ვადაში უნდა შეათანხმონ.

მუხლი 19

1.რუსეთის ფედერაცია უზრუნველყოფს აფხაზეთის ტერიტორიაზე მცხოვრებ რუსეთის მოქალაქეებს საჭირო მედიკამენტებითა და პრეპარატებით. ამასთან, რუსეთის მოქალაქეები მედიკამენტებს სპეციალური შეღავათებით მიიღებენ.
2. აფხაზეთი უფლებას აძლევს რუსეთის ფედერაციას, მე-19 მუხლის პირველი ნაწილით გათვალისწინებული ღონისძიების რეალიზაციის პროცესი გადაამოწმოს.
3. მე-19 მუხლის 1-ლი და მე-2 ნაწილებით გათვალისწინებული ღონისძიებების გეგმას მხარეები შეათანხმებენ ხელშეკრულების ძალაში შესვლიდან 6 თვის განმავლობაში.

მუხლი 20

1. განათლების დონის ამაღლების მიზნით აფხაზეთის რესპუბლიკა რუსეთის დახმარებით ხელშეკრულების ძალაში შესვლიდან 3 წლის განმავლობაში გაატარებს შემდეგ ღონისძიებებს:
_იღებს განათლების სისტემის განვითარებისთვის საჭირო სამართლებრივ-ნორმატიულ აქტებს, რომელიც შესაბამისობაში იქნება რუსეთის განათლების სისტემასთან;
_იმუშავებს საგანმანათლებლო პროგრამებს, უზრუნველყოფს პედაგოგთა კვალიფიკაციის გაზრდას, ახორციელებს საგანმანათლებლო საქმიანობას;
_ამაღლებს პრიორიტეტულ სამეცნიერო და ტექნოლოგიურ დარგებში სპეციალისტთა მომზადების დონეს.
2. მე-20 მუხლის 1-ლი ნაწილით გათვალისწინებული ღონისძიებების რეალიზების გეგმას მხარეები შეათანხმებენ ხელშეკრულების ძალაში შესვლიდან 6 თვის განმავლობაში.

მუხლი 21

1.რუსეთის ფედერაცია დაეხმარება აფხაზეთის რესპუბლიკას აფხაზური ენის განვითარების პროგრამის რეალიზებაში.
2. 21-ე მუხლით გათვალისწინებული ღონისძიებების გეგმას მხარეები ხელშეკრულების ძალაში შესვლიდან 6 თვის განმავლობაში შეათანხმებენ.

მუხლი 22

წინამდებარე ხელშეკრულება ექვემდებარება რატიფიკაციას და ძალაში შევა სარატიფიკაციო რწმუნებულებების გაცვლის შემდეგ.

მუხლი 23

წინამდებარე ხელშეკრულება იდება 10 წლის ვადით და ავტომატურად გრძელდება ყოველ 5 წელიწადში ერთხელ, თუ ერთ-ერთი მხარე არ მოინდომებს შეთანხმების მოქმედების შეწყვეტას. ამ შემთხვევაში ხელშეკრულებიდან გასვლის მსურველმა მხარემ მეორე მხარეს უნდა აცნობოს წერილობით, ხელშეკრულების ვადის ამუწურვამდე 6 თვით ადრე.

მუხლი 24

წინამდებარე ხელშეკრულებაში შესაძლოა ცვლილებების შეტანა, რაც შესაძლებელია ცალკეული პროტოკოლების გაფორმების შემთხვევაში. ცვლილებები შესაძლოა განხორციელდეს როგორც ერთი, ისე მეორე მხარის მოთხოვნით.

(თხოვთ კოლეგებს ტექსტის გამოყენების შემთხვევაში მიუთითონ წყარო).