კომპანია „ლიზინგი XXI"-ს თბილისში გუდიაშვილის ქუჩისა და რუსთაველის გამზირის კუთხეში 5 ვარსკვლავიანი სასტუმროს აშენება სურს. თბილისის მთავრობასა და კომპანიას შორის გაფორმებული ხელშეკრულებით, 1314 კვ/მ მიწის ნაკვეთზე უნდა აეშენებინა შენობა, რომლის 2700 კვ/მ ფართობი თბილისის ადგილობრივი თვითმმართველობისთვის უნდა გადაეცა. თუმცა ამჟამად ინვესტორი, აღნიშნული პირობის შესრულების ვალდებულებისაგან განთავისუფლებას ითხოვს.
საკითხზე დღეს თბილისის მუნიციპალიტეტის საკრებულოში, იურიდიულ საკითხთა და ქონების მართვისა და საფინანსო-საბიუჯეტო კომისიების გაერთიანებული სხდომაზე იმსჯელეს, სადაც თბილისის მუნიციპალიტეტის მერიის ქონების მართვის სააგენტოს წარმომადგენელმა კარლო ლაფერაძემ ინვესტორის ახალი გეგმების შესახებ ისაუბრა. ლაფერაძის განმარტებით, ამჟამად ინვესტორს აქვს წინადადება, რომ შეუძლია აღნიშნულ ადგილზე 200 ნომრზე გათვლილი, ხუთვარსკვლავიანი სასტურმო ააშენოს და მან ამ მიზნით მიმართა თვითმმართველობას, რომ მოეხსნას თვითმმართველობისთვის 2700 კვ/მ ფართის გადაცემის ვალდებულება, რის სანაცვლოდაც ინვესტორი მზად არის თბილისის თვითმმართველობას 7 მლნ ლარი გადაუხადოს.